హైదరాబాద్ నాగోల్‌లో ఇద్దరు చిన్నారులు మిస్సింగ్: 10 రోజులుగా ఆచూకీ లేదు

హైదరాబాద్ నాగోల్ ప్రాంతానికి చెందిన ఇద్దరు చిన్నారులు 10 రోజులుగా కనిపించకుండా పోయారు. 8 ఏళ్ల వరుణ్ తేజ్, 6 ఏళ్ల మహేష్‌ల ఆచూకీ ఇంకా లభ్యం కాలేదు. ఈ ఘటనపై నాగోల్ పోలీస్ స్టేషన్‌లో కేసు నమోదు అయింది.

గత నెల 31వ తేదీ ఉదయం 8:30 గంటలకు వరుణ్ తేజ్, మహేష్ కనిపించకుండా పోయినట్లు తల్లిదండ్రులు పోలీసులకు ఫిర్యాదు చేశారు. స్కూల్‌కు వెళ్లలేదని తల్లి మందలించడంతో ఇద్దరు చిన్నారులు ఇంటి నుంచి బయటకు వెళ్లారని కుటుంబ సభ్యులు తెలిపారు. అదే రోజు రాత్రి 10:30 గంటలకు పోలీసులకు ఫిర్యాదు అందింది.

పోలీసులు అన్ని కోణాల్లో దర్యాప్తు చేస్తున్నారు. బస్ స్టేషన్లు, రైల్వే స్టేషన్లు, రద్దీ తక్కువగా ఉండే ప్రాంతాల్లో గాలింపు చర్యలు చేపడుతున్నారు. అన్ని పోలీస్ స్టేషన్లకు అలర్ట్ పంపించారు. కుటుంబ సభ్యులు నాగోల్ బండ్లగూడ, ఎల్‌వీ నగర్ పరిసర ప్రాంతాల్లో చిన్నారుల ఫోటోలతో ఫ్లెక్సీలు పట్టుకుని వెతుకుతున్నారు.

చిన్నారులు కనిపిస్తే స్థానిక పోలీస్ స్టేషన్‌కు సమాచారం అందించాలని పోలీసులు కోరుతున్నారు. వరుణ్ తేజ్, మహేష్ కుటుంబం అసలు ఆంధ్రప్రదేశ్‌కు చెందినది. ప్రస్తుతం వారి బంధువులందరూ హైదరాబాద్‌లోనే ఉంటున్నారు.