చైనాలో డాల్ఫిన్ తుఫాను: లక్షలాది మంది తరలింపు, షాంగైలో రెడ్ అలర్ట్

చైనా తూర్పు తీరాన్ని డాల్ఫిన్ తుఫాను తీవ్రంగా ప్రభావితం చేసింది. జేజియాంగ్ ప్రావిన్స్‌లో ఈ తుఫాను ఒకే రోజులో రెండుసార్లు తీరం దాటినట్లు చైనా నేషనల్ మెటీరియలాజికల్ సెంటర్ తెలిపింది. తుఫాను తీవ్రత తగ్గినా, దాని భారీ వర్షాల వల్ల వరదలు, ఉప్పెనలు సంభవిస్తాయని వాతావరణ అధికారులు హెచ్చరించారు.

పౌరులను రక్షించేందుకు చైనా ప్రభుత్వం భారీ ఎత్తున తరలింపు చర్యలు చేపట్టింది. పూజియాన్ ప్రావిన్స్‌లో సోమవారం ఉదయం వరకు ఆర్మీ, అత్యవసర బృందాలు 1,67,900 మందిని సురక్షిత ప్రాంతాలకు తరలించాయి. షాంగై నగరంలో ఆదివారం రాత్రి నాటికి దాదాపు 21,15,600 మందిని ఖాళీ చేయించి శిబిరాలకు పంపారు.

ఈ తుఫాను వలన పూజియాన్‌లోని నింగ్దే, నాన్ పింగ్ నగరాల్లో భారీ వర్షాలు కురిశాయి. రాబోయే రోజుల్లో అతి భారీ వర్షాలు పడే అవకాశం ఉందని జిన్హువా వార్తా సంస్థ తెలిపింది. రవాణా, పర్యాటక రంగాలు తీవ్రంగా దెబ్బతిన్నాయి. పూజియాన్‌లో 686 రోడ్డు మార్గాలు, 658 రైలు సర్వీసులు రద్దు చేశారు. 234 పర్యాటక ప్రదేశాలు మూసివేశారు. షాంగైలోని లెగో ల్యాండ్ రిసార్ట్ కూడా సోమవారం తాత్కాలికంగా మూతపడింది. షాంగై జిల్లా అధికారులు నగరానికి రెడ్ అలర్ట్ జారీ చేసి, పట్టణ వరదల ప్రమాదం గురించి నివాసులను హెచ్చరించారు.

తుఫాను లోపలి ప్రాంతాలకు విస్తరించి, 10 కంటే ఎక్కువ ప్రావిన్స్‌లలో వర్షాలు కురుస్తాయని చైనా నేషనల్ మెటీరియలాజికల్ సెంటర్ అంచనా వేసింది. బీజింగ్ వాతావరణ కేంద్రం నగరానికి ఆరెంజ్ రెయిన్ స్టార్మ్ అలర్ట్ జారీ చేసింది. మంగళవారం సాయంత్రం నుంచి గురువారం వరకు అత్యంత భారీ వర్షాలు కురుస్తాయని శాస్త్రవేత్తలు హెచ్చరించారు. ఈ నేపథ్యంలో బీజింగ్‌లో లెవెల్ 2 ఫ్లడ్ కంట్రోల్ ఎమర్జెన్సీ రెస్పాన్స్ అమలు చేస్తున్నారు. నదులు, కొండచరియల ప్రాంతాలకు వెళ్లవద్దని ప్రభుత్వం ప్రజలకు సూచించింది.

ఒక్క తుఫాను దేశంలోని సగం ప్రావిన్స్‌లను ఆందోళనకు గురిచేయడం అంతర్జాతీయంగా చర్చనీయాంశమైంది.