సికింద్రాబాద్‌లో ఉజ్జైని మహాకాళి బోనాల జాతర జూలై 19 నుంచి ప్రారంభం

సికింద్రాబాద్‌లోని ఉజ్జైని మహాకాళి అమ్మవారి ఆషాఢ బోనాల జాతర జూలై 19 నుంచి ప్రారంభం కానుంది. ఆ రోజు ఎదుర్కోలు జరగనుండగా, ఆగస్ట్ 3న మహా జాతర జరుగుతుంది.

ఉజ్జయిని నుంచి అమ్మవారిని తీసుకువచ్చి ఇక్కడ ప్రతిష్టించడం వల్ల ఈ ఆలయానికి ఉజ్జైని మహాకాళి పేరు వచ్చింది. ఆలయం రామగోపాల్‌పేట పోలీస్ స్టేషన్ ఎదురుగా ఉంది. సుత్తి కుటుంబం 1947 నుంచి సేవలందిస్తోంది. ప్రస్తుత చైర్మన్ సుత్తి కామేశ్వర్ ఏడో తరంకు చెందినవారు. ప్రధాన అర్చకుడు రామతీర్థ శర్మ 1990 నుంచి సేవలు కొనసాగిస్తున్నారు.

ఆషాఢ మాసంలో అమ్మవారికి ప్రత్యేక అభిషేకాలు, పూజలు నిర్వహిస్తారు. శుక్రవారాల్లో ప్రత్యేక అభిషేకం ఉంటుంది. భక్తులు బోనాలు, ఒడి బియ్యం, శాఖలు సమర్పిస్తారు. ఒడి బియ్యాన్ని ఇంటికి తెచ్చి వండుకోవడం ఆచారం. వేపకొమ్మలు సమర్పించడం వల్ల రోగాలు నివారిస్తాయని నమ్మకం.

జాతర రోజు తెల్లవారుజామున 4 గంటలకు అమ్మవారికి ప్రత్యేక అభిషేకం, మహాహారతి ఉంటుంది. రాత్రి బలిహరణ అనంతరం, మరుసటి రోజు రంగం (భవిష్యవాణి), పోతరాజు గావు, ఆ తర్వాత అమ్మవారి అంబారీ ఊరేగింపు నిర్వహిస్తారు. ఆలయ ప్రాంగణంలో 200 ఏళ్ల నాటి వేపచెట్టును చీరతో అలంకరించి పూజిస్తారు.

భక్తులకు నీటి సౌకర్యం వంటి ఏర్పాట్లు చేయాలని మంత్రుల ద్వారా ఆదేశించినట్లు చైర్మన్ తెలిపారు. దేశ విదేశాల నుంచి లక్షల మంది భక్తులు ఈ ఉత్సవానికి హాజరవుతారు.