ప్రభుత్వ సెక్యూరిటీల్లో విదేశీ పెట్టుబడులపై మూలధన లాభాల పన్ను రద్దుకు కేంద్రం ఆర్డినెన్స్ ఆమోదం

ప్రభుత్వ సెక్యూరిటీల్లో విదేశీ పోర్ట్ఫోలియో పెట్టుబడిదారులకు మూలధన లాభాల పన్ను రద్దు చేస్తూ కేంద్ర మంత్రివర్గం శుక్రవారం ఆదాయపు పన్ను చట్ట సవరణ ఆర్డినెన్సుకు ఆమోదం తెలిపింది.

ప్రస్తుతం విదేశీ పోర్ట్ఫోలియో ఇన్వెస్టర్లు 12 నెలలకు మించి హోల్డ్ చేసే ప్రభుత్వ బాండ్లపై 12.5% దీర్ఘకాలిక మూలధన లాభాల పన్ను చెల్లిస్తున్నారు. ఈ పన్ను భారాన్ని తొలగించడం ద్వారా విదేశీ పెట్టుబడులను ఆకర్షించాలనే ఉద్దేశంతో ప్రభుత్వం ఈ నిర్ణయం తీసుకుందని అధికార వర్గాలు తెలిపాయి.

ఇదే సమయంలో ప్రభుత్వ బాండ్లపై వచ్చే వడ్డీ ఆదాయంపై విధించే 20% విత్హోల్డింగ్ ట్యాక్స్ భారాన్ని తగ్గించే అవకాశాలను కూడా ప్రభుత్వం పరిశీలిస్తోందని సమాచారం. 2023కు ముందు ఈ వడ్డీ ఆదాయంపై 5% మేర రాయితీ ఉండగా, ఆ రాయితీని అప్పట్లో కేంద్రం ఎత్తివేసింది.

ఈ ఆర్డినెన్స్ రాష్ట్రపతి ఆమోదం పొంది చట్టంగా అమల్లోకి వచ్చాక విదేశీ ఇన్వెస్టర్లపై పన్ను భారం గణనీయంగా తగ్గనుంది. దీనివల్ల భారత ప్రభుత్వ సెక్యూరిటీల్లో విదేశీ పోర్ట్ఫోలియో ఇన్వెస్ట్మెంట్లు పెరిగే అవకాశముంది.