అమరావతిలో యూనివర్సిటీ ఆఫ్ వెస్ట్రన్ ఆస్ట్రేలియా క్యాంపస్ ఏర్పాటు

ఆస్ట్రేలియాకు చెందిన యూనివర్సిటీ ఆఫ్ వెస్ట్రన్ ఆస్ట్రేలియా (UWA) ఆంధ్రప్రదేశ్ రాజధాని అమరావతిలో క్యాంపస్ ఏర్పాటు చేయనుంది.

ఈ విషయాన్ని ఆస్ట్రేలియా ఉన్నత విద్యా ప్రతినిధి ఒక కార్యక్రమంలో ప్రకటించారు. ప్రస్తుతం ఆస్ట్రేలియాలో 1.4 లక్షల మంది భారతీయ విద్యార్థులు చదువుతున్నారని, విద్యా భాగస్వామ్యాన్ని మరింత బలోపేతం చేసేందుకు భారతదేశంలో విదేశీ యూనివర్సిటీ క్యాంపస్‌లను ఏర్పాటు చేస్తున్నామని ఆయన తెలిపారు.

ఇప్పటికే బెంగళూరులో యూనివర్సిటీ ఆఫ్ న్యూ సౌత్ వేల్స్ (UNSW) క్యాంపస్‌ను ప్రారంభించినట్లు వెల్లడించారు. ఆంధ్రప్రదేశ్ ప్రభుత్వ విద్యా విధానాన్ని అభినందించారు. విదేశీ విద్యా సంస్థల రాకతో విద్యార్థులకు అంతర్జాతీయ స్థాయి విద్య అందుబాటులోకి వస్తుందన్నారు.

UWA క్యాంపస్ ఏర్పాటు వల్ల అమరావతి విద్యా రంగంలో కీలక కేంద్రంగా మారనుంది. ఈ క్యాంపస్‌కు సంబంధించిన మరిన్ని వివరాలు త్వరలో వెల్లడిస్తామని ఆయన చెప్పారు.