యూరియా కొరత: ‘నో యూరియా ప్లీజ్’ అంటున్న ప్రభుత్వాలు, రైతులకు ప్రత్యామ్నాయాల ప్రోత్సాహం

ప్రస్తుతం ఖరీఫ్ సాగు సీజన్లో యూరియా ఎరువు కోసం రైతులు క్యూలైన్లలో నిలుచోవడం, నిరసనలు చేయడం వంటి పరిస్థితులు వెలుగు చూస్తున్నాయి. ఈ నేపథ్యంలో కేంద్ర, రాష్ట్ర ప్రభుత్వాలు రైతులకు ‘యూరియా వాడకాన్ని తగ్గించండి’ అనే పిలుపునిచ్చాయి. రసాయన ఎరువులపై ఆధారపడటం వల్ల భూసారం క్షీణించడం, నీటి కాలుష్యం పెరగడం వంటి సమస్యలు తలెత్తుతున్నాయని ప్రభుత్వాలు ఆందోళన వ్యక్తం చేస్తున్నాయి.

ప్రధానమంత్రి నరేంద్ర మోదీ పలుమార్లు యూరియా వినియోగాన్ని తగ్గించాలని రైతులకు సూచించారు. ఆయన మాట్లాడుతూ, ‘మన దేశంలో ఎరువుల కోసం విదేశాలపై ఆధారపడటం దౌర్భాగ్యం. రైతులు ఎరువులను సక్రమంగా వాడి మట్టి తల్లికి సేవ చేయాలి’ అని పేర్కొన్నారు. తెలుగు రాష్ట్రాల ముఖ్యమంత్రులు కూడా రసాయన ఎరువుల వాడకం నుంచి ప్రకృతి వ్యవసాయం వైపు మళ్లాలని రైతులకు విజ్ఞప్తి చేశారు. ప్రకృతి వ్యవసాయం వల్ల రైతులకు ఉత్పత్తి ఖర్చు తగ్గుతుందని, భూమి సారం మెరుగవుతుందని వారు అభిప్రాయపడ్డారు.

కేంద్ర ప్రభుత్వం ప్రకృతి వ్యవసాయం చేసే రైతులకు ఎకరానికి రూ. 4,000 ప్రోత్సాహకాన్ని ప్రకటించింది. దేశవ్యాప్తంగా యూరియా వినియోగం ఏడాదికి 350 లక్షల మెట్రిక్ టన్నులు కాగా, ఎరువుల సబ్సిడీకి లక్ష కోట్లకు పైగా ఖర్చు అవుతున్నట్టు కేంద్ర గణాంకాలు చెబుతున్నాయి. ఈ భారీ వ్యయాన్ని తగ్గించేందుకు, భూసార పరిరక్షణ కోసం నానో యూరియా, సేంద్రియ సాగు వంటి ప్రత్యామ్నాయాలను ప్రభుత్వం ప్రోత్సహిస్తోంది.

తెలుగు రాష్ట్రాల్లో ఈ ఏడాది యూరియా వినియోగాన్ని సుమారు 3.71 లక్షల మెట్రిక్ టన్నుల మేర తగ్గించాలని అధికారులు లక్ష్యంగా పెట్టుకున్నారు. గత నాలుగేళ్ల సగటు వినియోగం 36.71 లక్షల టన్నులుగా ఉండగా, ఈ సీజన్లో 33 లక్షల టన్నులకు పరిమితం చేయాలని భావిస్తున్నారు. అయితే ప్రస్తుతం డిమాండ్ కు తగిన సరఫరా లేకపోవడంతో రైతులు ఇబ్బందులు ఎదుర్కొంటున్నారు.

‘ప్రతి గ్రామం నుంచి ఎరువుల కొనుగోలు కోసం రూ.4.24 కోట్లు బయటకు పోతోందని, సేంద్రియ వ్యవసాయం ద్వారా ఈ నిధులు గ్రామంలోనే నిలిచి ఉంటాయని’ ఒక ప్రభుత్వ ప్రతినిధి వివరించారు. ఈ నేపథ్యంలో రైతులు యూరియాకు ప్రత్యామ్నాయాలను స్వీకరించేలా విస్తృత అవగాహన కార్యక్రమాలు చేపట్టనున్నట్టు తెలిపారు.