బర్త్ టూరిజం క్రాక్‌డౌన్: ఆఫ్రికా, యూరప్‌లో నెట్‌వర్క్‌లు గుర్తించిన అమెరికా.. వందల వీసాలు రద్దు

అంతర్జాతీయ 'బర్త్ టూరిజం' నెట్‌వర్క్‌లపై అమెరికా స్టేట్ డిపార్ట్‌మెంట్ పెద్ద ఎత్తున చర్యలు చేపట్టింది. ఆఫ్రికా, యూరప్‌లోని పలు దేశాల్లో కార్యకలాపాలు సాగిస్తున్న ఈ నెట్‌వర్క్‌లను గుర్తించినట్లు ప్రకటించింది. ఈ క్రాక్‌డౌన్‌లో భాగంగా వందల సంఖ్యలో వీసాలు రద్దు చేసి, పలువురిపై శాశ్వత ప్రయాణ నిషేధం విధించినట్లు తెలిపింది.

'బర్త్ టూరిజం' అంటే అమెరికా గడ్డపై పిల్లలకు జన్మనివ్వడం ద్వారా వారికి స్వయంచాలక పౌరసత్వం పొందించాలన్న ఉద్దేశంతో టూరిస్ట్ వీసాలపై ప్రయాణించడం. అమెరికాలో జన్మనివ్వడం నేరం కానప్పటికీ, వీసా ఇంటర్వ్యూల సమయంలో నిజమైన ప్రయాణ కారణాన్ని దాచడం, తప్పుడు పత్రాలు సమర్పించడం నేరమని స్టేట్ డిపార్ట్‌మెంట్ స్పష్టం చేసింది. వీరి కోసం పనిచేసే అక్రమ బ్రోకర్లు, వీసా ఫిక్సర్ల నెట్‌వర్క్‌లను కూడా ఛేదించినట్లు వెల్లడించింది.

గణాంకాల ప్రకారం, పశ్చిమ ఆఫ్రికాలో 100 మందికి పైగా విదేశీయులు నకిలీ పత్రాలతో వీసాలు పొందినట్లు గుర్తించారు. ఉత్తర ఆఫ్రికాలోనూ మరో 100 మంది వీసాలు రద్దు చేశారు. యూరప్‌లో అయితే 2024 నుంచి ఇప్పటి వరకూ 400కు పైగా అనుమానాస్పద కేసులు నమోదయ్యాయి. వీసా ఇంటర్వ్యూలకు దరఖాస్తుదారులను కోచింగ్ ఇస్తూ, కుట్రలో భాగమైన ఆరు ప్రైవేటు కంపెనీలను సైతం గుర్తించినట్లు స్టేట్ డిపార్ట్‌మెంట్ తెలిపింది.

2020 జనవరిలో ట్రంప్ తొలి టర్మ్ సమయంలో అమల్లోకి వచ్చిన వీసా నిబంధనల సవరణ ద్వారానే ఈ చర్యలకు చట్టపరమైన బలం లభించింది. అమెరికా పౌరసత్వం పొందించడమే వీసా ప్రాథమిక లక్ష్యంగా భావిస్తే దరఖాస్తును తిరస్కరించే అధికారం కాన్సులర్ కార్యాలయాలకు అప్పుడే లభించింది. ప్రస్తుతం జరిగిన చర్యలు ఇదే నిబంధన ఆధారంగా తీసుకున్నారు.

ఈ క్రాక్‌డౌన్ ప్రభావం ఆఫ్రికా దేశాల సామాన్య ప్రయాణికులు, విద్యార్థులు, వ్యాపార నిపుణులపై తీవ్రంగా ఉంటుందని నిపుణులు హెచ్చరిస్తున్నారు. 'అమెరికా ఫస్ట్' విధానంలో భాగంగా ఆఫ్రికాలోని 50 ఎంబసీలు, కాన్సులేట్లలో వీసా ప్రాసెసింగ్ 20కే పరిమితం చేస్తామని అమెరికా ఇప్పటికే ప్రకటించింది. దీంతో చిన్న దేశాల ప్రజలు కేవలం వీసా ఇంటర్వ్యూ కోసమే అంతర్జాతీయ సరిహద్దులు దాటి ప్రయాణించాల్సిన పరిస్థితి ఏర్పడుతుంది. అమెరికన్ యూనివర్శిటీ ప్రొఫెసర్ డా. క్వాకు నుఅమా ఈ విధానంపై విమర్శలు చేస్తూ, నిజమైన అవసరాలతో వెళ్లేవారిని, క్రిమినల్ నెట్‌వర్క్‌ల బారిన పడిన బాధితులను కలిపి చూడకూడదని అభిప్రాయపడ్డారు. ఇమ్మిగ్రేషన్ విధానంలో ద్వంద్వ ప్రమాణాలు ఉన్నాయన్న ఆయన, తెల్ల జాతి వలసదారులకు ప్రోత్సాహకాలు, ఆఫ్రికా నుంచి వచ్చే వారికి కఠిన నిబంధనలు ఉన్నాయని ఆరోపించారు.

అయితే, అమెరికా 14వ సవరణ ప్రకారం ఆ దేశంలో జన్మించిన వారికి పౌరసత్వం లభిస్తుంది. ఈ అంశం చుట్టూ వాషింగ్టన్‌లో రాజకీయ చర్చ కొనసాగుతూనే ఉంది. ఈ నేపథ్యంలో, వీసా నిబంధనల ఉల్లంఘనపై స్టేట్ డిపార్ట్‌మెంట్ తీసుకున్న చర్యలతో ఇమ్మిగ్రేషన్ విధానంలో మరిన్ని కఠిన నిబంధనలు రానున్నాయనే సంకేతాలు కనిపిస్తున్నాయి.