ఇరాక్‌లోని అమెరికా స్థావరంపై డ్రోన్ దాడి; ఐదు డ్రోన్లను గాల్లోనే కూల్చివేత

ఇరాక్‌లోని ఎర్బిల్ విమానాశ్రయంలో ఉన్న అమెరికా సైనిక స్థావరంపై డ్రోన్ దాడి జరిగింది. పేలుడు పదార్థాలతో వచ్చిన ఐదు డ్రోన్లను అమెరికా దళాలు గాల్లోనే కూల్చివేశాయి. ఈ దాడిలో ప్రాణ, ఆస్తి నష్టం జరగలేదని అధికారులు తెలిపారు.

బహ్రెయిన్ లో కూడా ఇరాన్ వైమానిక దాడులను ఆ దేశ ప్రభుత్వం అడ్డుకుంది.

అమెరికా ఇరాన్ లోని నావికా సైనిక స్థావరాలపై దాడులు చేస్తోంది. ఇస్ఫహాన్ ప్రావిన్స్, కేష్మ్ ద్వీపం, కుజేస్తాన్, దక్షిణ ఫార్స్ ప్రాంతాలను లక్ష్యంగా చేసుకుంది. గత కొన్ని వారాల్లో జరిగిన ఈ దాడుల్లో ఇరాన్ లో 55 మంది మరణించారు. 600 మందికి పైగా గాయపడ్డారు.

హోర్ముజ్ జలసంధిపై నియంత్రణ సాధించేందుకు ఇరాన్ ప్రయత్నిస్తుండగా, ఈ దాడులు చేస్తున్నట్లు అమెరికా పేర్కొంది. వాణిజ్య నౌకలు, నావికులపై ఇరాన్ బెదిరింపును తగ్గించడం తమ లక్ష్యమని అమెరికా తెలిపింది.

ఈ ఉద్రిక్తల నేపథ్యంలో, ఇరాన్‌కు చెందిన IRGC పొరుగు దేశాలకు హెచ్చరిక జారీ చేసింది. అమెరికా సైనిక స్థావరాల నుండి ప్రజలు దూరంగా ఉండాలని సూచించింది.

అంతర్జాతీయ మార్కెట్లో బ్రెంట్ క్రూడ్ ధర బ్యారెల్ $100 దాటింది. హోర్ముజ్ జలసంధి, పర్షియన్ గల్ఫ్‌లో సుమారు 400 వాణిజ్య నౌకలు నిలిచిపోయాయి. వీటిలో 6,000 మందికి పైగా నావికులు ఆహారం, నీరు, వైద్య సదుపాయాలు లేక తీవ్ర ఇబ్బందులు ఎదుర్కొంటున్నారు. దీనిపై ఐక్యరాజ్య సమితి మానవ హక్కుల విభాగం ఆందోళన వ్యక్తం చేసింది.

అమెరికా అధ్యక్షుడు డోనాల్డ్ ట్రంప్ ఇరాన్, హూతీ తిరుగుబాటుదారులకు హెచ్చరికలు జారీ చేశారు. నౌకలపై దాడులు కొనసాగిస్తే భారీ సైనిక చర్య తప్పదని తెలిపారు. దాడుల వల్ల నౌకలు, కార్గోలకు జరిగిన నష్టాన్ని అమెరికా ఆధీనంలో ఉన్న ఇరాన్ నిధుల నుండి వసూలు చేస్తామని స్పష్టం చేశారు.

ట్రంప్ వ్యాఖ్యలను ఇరాన్ విదేశాంగ మంత్రి అబ్బాస్ అరాగ్చి ఖండించారు. ఇతరుల ఆస్తులను జప్తు చేయడం దారుణమని, ఇది తీవ్ర పరిణామాలకు దారితీస్తుందని హెచ్చరించారు.