అమెరికా-ఇరాన్ శాంతి ఒప్పందం: భారత మార్కెట్లకు ఊరట, ముడి చమురు ధరలు తగ్గుముఖం

అమెరికా, ఇరాన్ మధ్య కుదిరిన పరిమిత మధ్యంతర శాంతి ఒప్పందం భారత ఆర్థిక వ్యవస్థకు పెద్ద ఊరటనిచ్చింది. ఈ ఒప్పందం వల్ల ముడి చమురు ధరలు గణనీయంగా తగ్గాయి, దేశీయ స్టాక్ మార్కెట్లు గ్రీన్లో ప్రారంభమయ్యాయి. ఈ వారం చివర్లో అధికారికంగా ఒప్పందంపై సంతకాలు జరగనున్న నేపథ్యంలో ప్రపంచ మార్కెట్లు సానుకూలంగా స్పందించాయి.

ఆర్థికవేత్త పికె బసు ఈ పరిణామాన్ని భారత్కు 'గుడ్ న్యూస్'గా అభివర్ణించారు. ఆయన మాట్లాడుతూ, 'ఈ ఒప్పందం హార్ముజ్ జలసంధిపై ఇరాన్ ఆంక్షలను ఎత్తివేయడంతో పాటు ఇరాన్ నౌకాశ్రయాలపై అమెరికా దిగ్బంధనాన్ని క్రమంగా తొలగిస్తుంది. దీంతో చమురు, గ్యాస్ సరఫరా పెరిగి ధరలు తగ్గుతాయి. పెట్రోకెమికల్స్, ఎరువుల ధరలూ దిగొస్తాయి. ఫలితంగా ప్రపంచ ఆర్థిక వ్యవస్థకు ఇది సానుకూలమే' అని వివరించారు.

గత మూడున్నర నెలలుగా పశ్చిమాసియా యుద్ధ భయంతో మార్కెట్లు అనిశ్చితిగా ఉన్నాయి. తాజా ఒప్పందంతో ఆ పరిస్థితి సడలింది. ముడి చమురు బ్రెంట్ ధర బ్యారెల్‌కు 75 డాలర్ల స్థాయికి చేరవచ్చని బసు అంచనా వేశారు. రూపాయి విలువ డాలరుతో 93 స్థాయికి బలపడవచ్చన్నారు.

జనవరి-మార్చి త్రైమాసికంలో భారత కరెంట్ అకౌంట్ మిగులు నమోదు కాగా, గత ఆర్థిక సంవత్సరం మొత్తానికి కరెంట్ ఖాతా లోటు జీడీపీలో 0.6% మాత్రమే. ఈ ఏడాది లోటు 0.5% లోపే ఉండవచ్చని బసు తెలిపారు. ప్రభుత్వం ప్రవేశపెట్టిన ప్రోత్సాహకాలతో విదేశీ సంస్థాగత పెట్టుబడులు భారీగా రావచ్చని, ఈక్విటీ మార్కెట్లు ఆకర్షణీయంగా మారాయని ఆయన వివరించారు. చమురు ధరలు తగ్గడం వల్ల భారత ఆర్థిక వ్యవస్థకు మరింత ఊతం లభిస్తుందని స్పష్టం చేశారు.