US-ఇరాన్ శాంతి ఒప్పందంపై రేపు జెనీవాలో సంతకాలు చేసే అవకాశం

US, ఇరాన్ మధ్య శాంతి ఒప్పందం చర్చలు దాదాపు కుదిరినట్లు సమాచారం. రాయిటర్స్ నివేదిక ప్రకారం, రేపు జెనీవాలో అవగాహన ఒప్పందంపై సంతకాలు జరిగే అవకాశం ఉంది. అమెరికా ఉపాధ్యక్షుడు జేడి వాన్స్, ఇరాన్ పార్లమెంటరీ స్పీకర్ మొహమ్మద్ భాకర్ ఈ ఒప్పందంపై సంతకాలు చేస్తారని రాయిటర్స్ తెలిపింది.

అమెరికా అధ్యక్షుడు డొనాల్డ్ ట్రంప్ ఇరాన్తో యుద్ధాన్ని ముగించే ఒప్పందం దాదాపు పూర్తయిందని ప్రకటించారు. ఈ వారంతంలో యూరప్లో సంతకాలు జరిగే అవకాశం ఉందని, తన ఉపాధ్యక్షుడు హాజరవుతారని చెప్పారు. అణ్వాయుధాలను ఎప్పటికీ కలిగి ఉండకూడదన్న తమ షరతుకు ఇరాన్ ఒప్పుకుందని, ఒప్పందం ఖరారైతే హార్ముజ్ జలసంధి తిరిగి తెరుచుకుంటుందని ట్రంప్ తెలిపారు. అణ్వాయుధాలను కొనుగోలు చేయడం, అభివృద్ధి చేయడం ఇరాన్ చేయదని స్పష్టం చేశారు.

ఇరాన్ వైపు నుంచి ఒప్పందానికి సంబంధించి భిన్న సంకేతాలు వస్తున్నాయి. ఇరాన్ సీనియర్ అధికారి ఒకరు రాయిటర్స్‌తో మాట్లాడుతూ, కొత్త ఒప్పందంలో ఆంక్షల సడలింపు, ఇరాన్ ఆస్తులపై నిషేధం తొలగింపు వంటి రాయితీలు ఉన్నాయని చెప్పారు. లెబనాన్‌లో హిజ్బుల్లాకు వ్యతిరేకంగా ఇజ్రాయిల్ సైనిక చర్యలను ఈ ఒప్పందం పరిధిలోకి తీసుకోవాలని ఇరాన్ పట్టుబడుతున్నట్లు రాయిటర్స్ పేర్కొంది. అయితే, ఇరాన్ విదేశాంగ శాఖ ప్రతినిధి ఇస్మాయిల్ మాట్లాడుతూ, ఈ ఒప్పందంపై తుది నిర్ణయం తీసుకోలేదని, ఇటీవలి కథనాలన్నీ ఊహాగానాలేనని తెలిపారు.

ట్రంప్ ఇరాన్ అధికారిక మీడియా ప్రచురించిన ఒప్పంద వివరాలపై ఆగ్రహం వ్యక్తం చేశారు. ఆ నివేదిక సరైనది కాదని, ఇరు దేశాలు అంగీకరించిన అంశాలు వేరే అని ఖండించారు. ఇరాన్ విదేశాంగ మంత్రి అబ్బాస్ అరాఘ్చీ మాట్లాడుతూ, శాంతి ఒప్పందానికి ఎప్పుడూ లేనంత దగ్గరగా వచ్చామని, కానీ ఒప్పందం ఖరారయ్యే వరకు మీడియాలో లీకులను నమ్మవద్దని కోరారు. ఈ పోస్ట్‌ను ట్రంప్ తన సోషల్ మీడియాలో షేర్ చేశారు.

ఒప్పందం కుదిరితే మిడిల్ ఈస్ట్‌లో స్థిరత్వానికి అనుకూలంగా ఉంటుందని అంతర్జాతీయ వర్గాలు అంచనా వేస్తున్నాయి. చర్చల చివరి దశకు వచ్చాయని, కానీ కొన్ని విభేదాలు ఇంకా మిగిలి ఉన్నాయని నివేదికలు చెబుతున్నాయి.