అమెరికా-ఇరాన్ శాంతి ఒప్పందం దగ్గర పడుతోంది

అమెరికా-ఇరాన్ మధ్య శాంతి ఒప్పందం దాదాపు ఖాయంగా కనిపిస్తోంది. అమెరికా డిమాండ్ చేసిన శుద్ధి చేసిన యురేనియం నిల్వలను వదులుకునేందుకు ఇరాన్ అంగీకరించినట్లు చర్చలో పాల్గొన్న ఇద్దరు అధికారులు తెలిపారు.

ఇరాన్ అధ్యక్షుడు మసౌద్ పెజిష్కియాన్ ఒక వార్తా సంస్థకు ఇచ్చిన ఇంటర్వ్యూలో మాట్లాడారు. తమ దేశం అణ్వాయుధాల కోసం పని చేయడం లేదని ప్రపంచానికి నిరూపించేందుకు సిద్ధంగా ఉన్నామని తెలిపారు.

చర్చలు నిర్మాణాత్మకంగా సాగుతున్నాయని అమెరికా అధ్యక్షుడు డొనాల్డ్ ట్రంప్ Truth Social లో పోస్ట్ చేశారు. చాలా అంశాలపై సంప్రదింపులు ముగిశాయని, అయితే తొందరపడవద్దని చర్చా బృందానికి సూచించినట్లు పేర్కొన్నారు. ఒప్పందంపై సంతకాలు పూర్తయ్యేదాకా ఇరాన్ ఓడరేవుల దిగ్బంధనం కొనసాగిస్తామని ట్రంప్ స్పష్టం చేశారు.

ఒప్పందం ముందుగా కుదుర్చుకొని, ఆ తర్వాత 60 రోజుల కాలావధిలో వివరాలపై రెండు దేశాలు చర్చిస్తాయని అధికారులు తెలిపారు. ఇరాన్ వద్ద ప్రస్తుతం 60% స్థాయిలో శుద్ధి చేసిన యురేనియం 440 కిలోగ్రాముల వరకు ఉందని అంచనా. కొంత భాగాన్ని dilute చేసి, మిగిలిన మొత్తాన్ని తృతీయ దేశానికి అప్పగించే అవకాశం ఉందని సమాచారం.

60 రోజుల చర్చలలో హర్మూజ్ జలసంధిని క్రమంగా తెరవడం, ఇరాన్ పై ఆంక్షలు సడలించడం, చమురు విక్రయాలకు అనుమతి, జప్తు చేసిన ఇరాన్ ఆస్తుల విడుదల వంటి అంశాలు చేర్చుతారు. లెబనాన్‌లో హిజ్బుల్లా-ఇజ్రాయిల్ మధ్య జరుగుతున్న సంఘర్షణ కూడా ఈ ఒప్పందంలో భాగంగా ముగుస్తుందని అధికారులు తెలిపారు.