250 ఏళ్ల స్వాతంత్య్ర వేడుక: ట్రంప్ ముఖంతో డాలర్ నాణెం తయారీ; జీవించివున్న అధ్యక్షుడి చిత్రం ముద్రణ పై వివాదం

అమెరికా ట్రెజరీ శాఖ దేశ 250వ స్వాతంత్య్ర వార్షికోత్సవం సందర్భంగా, అధ్యక్షుడిగా కొనసాగుతున్న డోనాల్డ్ ట్రంప్ ముఖ చిత్రంతో కొత్త $1 నాణెం తయారీని ప్రారంభించింది. జీవించివున్న అధ్యక్షుడి చిత్రం అమెరికా కరెన్సీపై ముద్రించడం ఇదే తొలిసారి.

బంగారు రంగు ముగింపుతో తయారవుతున్న ఈ నాణెం ముందువైపున ట్రంప్ పోర్ట్రెయిట్‌తో పాటు ‘ఇన్ గాడ్ వి ట్రస్ట్’ అనే వాక్యం, 1776-2026 సంవత్సరాలు ఉంటాయి. వెనుకవైపు అమెరికన్ ఈగిల్, 250 నక్షత్రాలు, ‘ఈ ప్లూరిబస్ యూనమ్’ (అనేకం నుండి ఒకటి) నినాదం, ఆలివ్ కొమ్మ ఉంటాయి. ఈ నాణెం ఈ ఏడాది శరదృతువులో విడుదల కానుంది.

ఈ నాణెం ‘స్వేచ్ఛ, దేశభక్తి, అమెరికన్ విలువల బలాన్ని’ గౌరవిస్తుందని ట్రెజరీ కార్యదర్శి స్కాట్ బస్సెన్ చెప్పారు. ట్రంప్ స్పందిస్తూ, ‘చాలా క్యూట్‌గా ఉంది, చిత్రం అద్భుతంగా లేదు కానీ నాకు నాణెం ఇవ్వడం చాలా గౌరవంగా ఉంది’ అని ఫాక్స్ బిజినెస్‌తో అన్నారు.

అయితే జీవించివున్న వ్యక్తుల చిత్రాలను కరెన్సీపై ముద్రించడాన్ని 1866 నాటి చట్టం నిషేధిస్తుంది. రాచరిక సంప్రదాయానికి దూరంగా ఉండేందుకు 150 ఏళ్లకు పైగా ఈ నియమాన్ని పాటిస్తున్నారు. కానీ ట్రంప్ ప్రభుత్వం, 2020లో ట్రంప్ స్వయంగా సంతకం చేసిన ‘సర్క్యులేటింగ్ కలెక్టిబుల్ కాయిన్ రీడిజైన్ యాక్ట్‌’ను ఆధారంగా చూపిస్తోంది. ఈ చట్టం 250వ వార్షికోత్సవం కోసం ప్రత్యేక నాణేల శ్రేణికి అనుమతిస్తుంది. ఆ చట్టంలో జీవించివున్న వారి చిత్రాలను వెనుకవైపు (రివర్స్) మాత్రమే నిషేధించింది, ముందువైపు (అబ్వర్స్) పై నిషేధం లేదు. ఈ ‘లొసుగు’తోనే ట్రంప్ ముఖం నాణెంపై రావడం సాధ్యమైందని ప్రభుత్వం వాదిస్తోంది.

విమర్శకులు మాత్రం ఈ నాణెం ఆర్థిక విధానం కాదని, ద్రవ్యోల్బణం తగ్గించదని, అప్పులు తీర్చదని అంటున్నారు. ఇది కేవలం నాణెంపై ఉన్న వ్యక్తి ప్రతిష్టకు మాత్రమే ఉపయోగపడుతుందన్నది వారి వాదన. గత మార్చిలో ట్రంప్ సంతకాన్ని పేపర్ కరెన్సీపై ముద్రించే ప్రణాళిక కూడా వెల్లడైంది. ఈ పరిణామాలతో అధ్యక్షుడి చిత్రం కరెన్సీపై ముద్రించడం చట్టబద్ధమేనా అన్న చర్చ సాగుతోంది.