అమెరికా పౌరసత్వ దరఖాస్తు ఫీజు 80% వరకు పెంపు ప్రతిపాదన; భారతీయులపై తీవ్ర ప్రభావం

అమెరికా డిపార్ట్మెంట్ ఆఫ్ హోమ్లాండ్ సెక్యూరిటీ (DHS) పౌరసత్వం కోసం దాఖలు చేసే N-400 దరఖాస్తు ఫీజును భారీగా పెంచే ప్రతిపాదనను తీసుకువచ్చింది. కాగితం ద్వారా దరఖాస్తు చేసుకుంటే ప్రస్తుతం ఉన్న $760 నుంచి $1,330కి, ఆన్లైన్ దరఖాస్తుకు $710 నుంచి $1,280కి పెంచాలని ప్రతిపాదించింది. తక్కువ ఆదాయం ఉన్నవారికి ఫీజును $380గా నిర్ణయించారు, కానీ ఈ మినహాయింపు కాగితం దరఖాస్తుకు మాత్రమే వర్తిస్తుంది.

ఈ మార్పులు అమల్లోకి వస్తే అమెరికాలో శాశ్వత నివాసం, పౌరసత్వం కోసం ఎదురుచూస్తున్న భారతీయులతో సహా లక్షల మంది వలసదారులపై ఆర్థిక భారం పడుతుంది. ప్రతి సంవత్సరం గ్రీన్ కార్డు పొందే వారిలో భారతీయుల సంఖ్య అత్యధికంగా ఉంటుంది. భారత విదేశాంగ మంత్రిత్వ శాఖ లెక్కల ప్రకారం, 2026 జనవరి నాటికి అమెరికాలో 60 లక్షల మంది భారతీయులు నివసిస్తున్నారు. వీరిలో 37.6 లక్షల మంది భారతీయ సంతతి అమెరికన్ పౌరులు కాగా, 23.1 లక్షల మంది ప్రవాస భారతీయులు.

గత కొన్నేళ్లలో భారతీయులకు లభించే గ్రీన్ కార్డుల సంఖ్య గణనీయంగా తగ్గింది. 2022లో 1.27 లక్షల మందికి గ్రీన్ కార్డులు మంజూరు కాగా, 2023లో ఆ సంఖ్య 78,700కి, 2024నాటికి 66,800కి పడిపోయింది. అంటే రెండేళ్లలో 50% మేర తగ్గుదల కనిపించింది. దీంతో కొత్త ఫీజు భారం భారతీయుల వలస ప్రణాళికలపై ప్రభావం చూపే అవకాశం ఉంది.

పౌరసత్వం కాకుండా H-1B వంటి వీసాల ఫీజులను కూడా ట్రంప్ ప్రభుత్వం గతంలో పెంచింది. దీనిపై ఆయా దేశాల్లో వివాదం చెలరేగింది. ప్రస్తుతం ప్రతిపాదిత నిబంధనలను 60 రోజుల ప్రజాభిప్రాయ సేకరణకు ఉంచారు. ఆ గడువు ముగిసే వరకు ఫీజులు మార్పు ఉండదు.