రష్యా చమురు దిగుమతిపై 100% సుంకాల బిల్లుకు అమెరికా సెనెట్ ఆమోదం; భారత్‌పై ప్రభావం

రష్యా నుంచి చమురు, గ్యాస్ ఎక్కువగా దిగుమతి చేసుకునే దేశాలపై 100% సుంకాలు విధించే బై-పార్టీ బిల్లుకు అమెరికా సెనెట్ ఆమోదం తెలిపింది. రష్యా చమురు దిగుమతిలో అగ్రస్థానంలో ఉన్న భారత్, చైనా సహా ఐదు దేశాలపై ఈ సుంకాలు ప్రతిపాదించారు.

ఈ బిల్లులో రష్యా అధ్యక్షుడు పుతిన్, సీనియర్ నాయకులు, ఆర్థిక సంస్థలు, ఇంధన ప్రాజెక్టులపై ఆంక్షలు విధించే అంశాలు కూడా ఉన్నాయి. ఆంక్షలు తప్పించుకోవడానికి ఇతర దేశాల జెండాలతో నడిచే పాత చమురు ట్యాంకర్లపైనా చర్యలు తీసుకునేందుకు అవకాశం కల్పించింది. బిల్లును ఈ నెల చివరిలో ప్రతినిధుల సభకు పంపి ఆమోదం కోరనున్నారు.

భారతదేశం ప్రస్తుతం రోజుకు 5 మిలియన్ బ్యారెల్స్‌కు పైగా ముడి చమురు దిగుమతి చేసుకుంటోంది. ఇందులో రష్యా నుంచి 2.8 మిలియన్ బ్యారెల్స్ వస్తున్నాయి, ఇది మొత్తం దిగుమతుల్లో 55.5%. ఇదే సమయంలో అమెరికా నుంచి ఎల్పీజీ దిగుమతులు కూడా భారీగా ఉన్నాయి. జూలైలో 12 లక్షల టన్నుల ఎల్పీజీ దిగుమతి చేసుకోగా, అందులో 9 లక్షల టన్నులు అమెరికా నుంచే వచ్చాయి.

భారత్ అమెరికాకు చెందిన 500 బిలియన్ డాలర్ల ఉత్పత్తుల కొనుగోలుకు ఐదేళ్ల ఒప్పందం కుదుర్చుకుంది. రాబోయే రోజుల్లో రష్యా నుంచి చమురు దిగుమతులు తగ్గించుకుంటామని హామీ ఇచ్చింది. గత రెండేళ్లుగా ఇతర దేశాల నుంచి చమురు సరఫరా పెంచుకునే వ్యూహం చేపట్టింది.