కాల్పుల విరమణ మధ్యనే అమెరికా ఇరాన్ నౌకా స్థావరాలపై దాడులు

కాల్పుల విరమణ అమల్లో ఉన్నప్పటికీ అమెరికా వాయుసేన దక్షిణ ఇరాన్ లోని సైనిక స్థావరాలపై దాడులు నిర్వహించింది. సముద్రంలో మైన్లు అమర్చేందుకు ప్రయత్నిస్తున్న ఇరాన్ సైనిక నౌకలను లక్ష్యంగా చేసుకొని ఈ దాడులు జరిగాయి.

హర్ముస్ జలసంధికి సమీపంలో ఉన్న బందర్ అబ్బాస్, సిరిక్, జాస్క్ నగరాల్లోని సైనిక స్థావరాలపై బాంబులు పడ్డాయి. ఈ దాడుల్లో ఇరాన్ క్షిపణి వ్యవస్థలు దెబ్బతిన్నట్లు అంతర్జాతీయ నివేదికలు తెలిపాయి.

తమ దళాల భద్రత కోసమే ఈ ఆత్మరక్షణ దాడులు చేశామని అమెరికా సెంట్రల్ కమాండ్ ప్రతినిధి కెప్టెన్ టీం హాకిన్స్ అధికారికంగా ధృవీకరించారు.

ఇదే సమయంలో కతార్ లో అమెరికా, ఇరాన్ మధ్య శాంతి చర్చలు జరుగుతున్నాయి. ఇరాన్ పార్లమెంట్ స్పీకర్ మహమ్మద్ బాగీర్ గాలిబాఫ్ నేతృత్వంలో ఉన్నత స్థాయి బృందం ఈ చర్చల్లో పాల్గొంటోంది.

ఇరు దేశాలకు లాభదాయకంగా ఉండే ఒప్పందం కుదిరితేనే చర్చలు కొనసాగిస్తామని అమెరికా అధ్యక్షుడు డొనాల్డ్ ట్రంప్ పేర్కొన్నారు. ఇరాన్ అంగీకరించకపోతే మరింత తీవ్రమైన చర్యలకు సిద్ధంగా ఉన్నామని ట్రంప్ హెచ్చరించారు.

ఈ చర్చల్లో ఇరాన్ అణు కార్యక్రమం కీలకమైన అంశం. ఇరాన్ తన వద్ద ఉన్న సుసంపన్నమైన యురేనియంను అమెరికాకు అప్పగించడానికి లేదా అంతర్జాతీయ అణుశక్తి సంస్థ పర్యవేక్షణలో నాశనం చేయడానికి సూత్రప్రాయంగా అంగీకరించినట్లు తెలుస్తోంది. అయితే దీనిపై అధికారిక ప్రకటన రావడానికి కొంత సమయం పడుతుందని ఇరాన్ విదేశాంగ శాఖ తెలిపింది.