బీఆర్ఎస్ అవినీతి వల్లే కాలేశ్వరం కూలిపోయింది: మంత్రి ఉత్తమ్ కుమార్ రెడ్డి

తెలంగాణ మంత్రి ఉత్తమ్ కుమార్ రెడ్డి గత బీఆర్ఎస్ ప్రభుత్వానికి చెందిన ఇరిగేషన్ ప్రాజెక్టులపై తీవ్ర ఆరోపణలు చేశారు. కాళేశ్వరం ప్రాజెక్టు కుప్పకూలడానికి బీఆర్ఎస్ అవినీతే కారణమని ఆరోపించారు.

ఆయన మాట్లాడుతూ, బీఆర్ఎస్ ప్రభుత్వం 10 ఏళ్లలో ₹1.81 లక్షల కోట్లు ఇరిగేషన్‌కు ఖర్చు చేసినా ఒక్క ప్రాజెక్టు కూడా పూర్తి కాలేదని వివరించారు. కాలేశ్వరం ప్రాజెక్టు కూలిపోగా, పాలమూరు రంగారెడ్డి, సీతారామ, దేవాదుల, కల్వకుర్తి, నెట్టంపాడు, భీమా, కోయిల్ సాగర్ వంటి ప్రాజెక్టులు అసంపూర్తిగా ఉన్నాయన్నారు.

అన్నారం బ్యారేజీపై మరింత వివరాలు వెల్లడించారు. ఈ బ్యారేజీ పునాది అనుమానాస్పదంగా ఉందని, పైల్ ఫౌండేషన్ సరిగా లేదని నేషనల్ డ్యామ్ సేఫ్టీ అథారిటీ (ఎన్డీఎస్ఏ) 10 సార్లు నివేదిక ఇచ్చిందని ఆయన పేర్కొన్నారు. ఇక్కడ నీటి నిల్వ సాధ్యం కాదని కూడా ఎన్డీఎస్ఏ తెలిపిందని చెప్పారు. సుందీల బ్యారేజీలో కూడా ఇదే రకమైన లోపం ఉందన్నారు. పంప్ హౌస్ నుంచి అన్నారం, సుందీల, ఎల్లపెల్లి మధ్య లిఫ్టింగ్ విధానంలో డిజైన్ లోపాలు ఉన్నాయని వివరించారు.

బీఆర్ఎస్ ప్రభుత్వం అధిక వడ్డీ రుణాలు తీసుకుని ప్రాజెక్టులు నిర్మించిందని, ఇవి రైతుల కోసం కాక వ్యక్తిగత లాభం కోసమే నిర్మించారని ఆరోపించారు. ఇరిగేషన్ శాఖ నిర్వహణ పూర్తిగా అస్తవ్యస్తంగా ఉండేదన్నారు.

ఈ ఆరోపణలపై బీఆర్ఎస్ పార్టీ స్పందన తెలియాల్సి ఉంది.