పెద్దపల్లిలో ధాన్యం కొనుగోలుపై మంత్రులు ఉత్తమ్, పొంగులేటి సమీక్ష

పెద్దపల్లి జిల్లాలో ధాన్యం కొనుగోలు కార్యక్రమంపై మంత్రులు ఉత్తమ్ కుమార్ రెడ్డి, పొంగులేటి శ్రీనివాస్ రెడ్డి అధికారులతో సమీక్ష నిర్వహించారు. క్షేత్ర స్థాయిలో ధాన్యం కొనుగోలు కేంద్రాలను మంత్రులు పర్యటిస్తారని ప్రకటించారు.

చివరి గింజ వరకు మద్దతు ధరకు ధాన్యం కొనుగోలు చేస్తామని మంత్రి ఉత్తమ్ కుమార్ రెడ్డి హామీ ఇచ్చారు. వర్షాలతో తడిసిన ధాన్యానికి కూడా మద్దతు ధరే వర్తిస్తుందని భరోసా ఇచ్చారు. కేంద్రం నిర్దేశించిన లక్ష్యం కంటే ఎక్కువ ధాన్యం కొనుగోలు చేస్తామని పేర్కొన్నారు.

మద్దతు ధర ప్రకటించడం తప్ప రాష్ట్రాలకు సహకారం అందించడం లేదని కేంద్ర ప్రభుత్వంపై ఉత్తమ్ విమర్శించారు. ధాన్యం కొనుగోలులో అక్రమాలకు పాల్పడే మిల్లర్లు, వ్యాపారులపై కఠిన చర్యలు తీసుకుంటామని మంత్రి పొంగులేటి శ్రీనివాస్ రెడ్డి హెచ్చరించారు.

తెలంగాణలో స్వాతంత్ర్యానంతరం 29 రాష్ట్రాలతో పోలిస్తే అత్యధిక వరి ఉత్పత్తి నమోదైందని, ఐదు పంటల సీజన్లలో రికార్డు స్థాయిలో ధాన్యం సేకరణ జరిగిందని ఉత్తమ్ పేర్కొన్నారు.