వరలక్ష్మీ వ్రతం: పూజా విధానం, చేయలేనివారికి ప్రత్యామ్నాయ శ్లోకం

శ్రావణ మాసంలో పౌర్ణమికి ముందు వచ్చే శుక్రవారం వరలక్ష్మీ వ్రతాన్ని ఆచరిస్తారు. ఈ వ్రతాన్ని ముఖ్యంగా మహిళలు చేస్తారు. వరలక్ష్మీ వ్రతం చేసే రోజు ఆవునెయ్యితో దీపం వెలిగించాలని సంప్రదాయం చెప్తోంది.

పూజలో కనీసం ఒక్క పద్మం అయినా లక్ష్మీదేవికి అలంకరణగా ఉంచాలని సూచిస్తున్నారు. ఏనుగు బొమ్మలు కూడా పూజలో ఉంచాలని చెప్తున్నారు. అమ్మవారికి పూర్ణాలు నైవేద్యంగా సమర్పించాలని తెలిపారు. బియ్యపిండితో అష్టదళ పద్మం ముగ్గు వేయాలని కూడా సూచించారు.

వ్రతంలో మహిళలు తొమ్మిది పోగులతో తయారైన తోరాన్ని కుడి చేతికి కట్టుకుంటారు. దీనివల్ల పుత్ర పౌత్రాభివృద్ధి, ఆయుష్యు పెరుగుతాయని భక్తులు విశ్వసిస్తారు. తర్వాత మహిళలు ఒకరికొకరు వాయనాలు ఇచ్చుకుంటారు.

ఉద్యోగ బాధ్యతలు లేదా ఇతర కారణాలతో ఈ శుక్రవారం వ్రతం చేయలేని వారు శ్రావణ మాసంలో మరో శుక్రవారం చేసుకోవచ్చని సూచించారు. అది కూడా సాధ్యం కాని వారు 'పద్మాసనే పద్మకరే సర్వలోకైక పూజితే నారాయణ ప్రియే దేవి సుప్రీతా భవ సర్వదా' అనే శ్లోకం చదువుకోవచ్చని పేర్కొన్నారు.