వరలక్ష్మీ వ్రతం: పంచ నైవేద్యాలు, తప్పనిసరి పుష్పాలు, వాయనం వివరాలు

వరలక్ష్మీ వ్రతాన్ని ఈ ఏడాది ఆగస్టు 21 శుక్రవారం ఆచరించనున్నారు. పౌర్ణమికి ముందు వచ్చే శుక్రవారం ఈ వ్రతం చేస్తారని పండితులు తెలిపారు. ఆ రోజు వీలు కాకపోతే ఆగస్టు 28 శుక్రవారం ఆచరించవచ్చునని పౌరాణిక గ్రంథాల ఆధారంగా చెప్పారు.

వ్రత రోజు వరలక్ష్మీదేవికి ఐదు రకాల అన్న నైవేద్యాలు సమర్పించాలని పురాణ గ్రంథాల్లో ఉంది. అవి పెరుగన్నం, పాల పాయసం, పులిహోర, పులగం, బెల్లం కలిపిన అన్నం. ఒక్కో నైవేద్యం ఆరోగ్యం, సంపద, పదవులు, కుటుంబ సౌఖ్యం వంటి ఫలితాల కోసం చేస్తారని భక్తుల విశ్వాసం.

పూజ కోసం ఎర్ర మందార, గన్నేరు, తెల్ల పూలు వాడాలని సూచించారు. నీలం రంగు పూలు, గడ్డి పూలు మాత్రం సమర్పించకూడదని శాస్త్ర వచనం ఉంది.

అదనంగా అరటిపండు, కొబ్బరికాయ, దానిమ్మ, శనగలు, ఆవుపాలు, ఆవునెయ్యి నైవేద్యంగా పెట్టవచ్చు. కలశంలో వెండి నాణెం ఉంచాలి. అమ్మవారి పక్కన ఒకటి లేదా రెండు ఏనుగు బొమ్మలు పెట్టాలని, ఇనుప ఏనుగు బొమ్మ వాడకూడదని సూచించారు.

వ్రతం పూర్తయ్యాక తాంబూల వాయనం ఇవ్వాలని సంప్రదాయం. అందులో లేత తమలపాకులు, రెండు వక్కలు, అరటిపండు, శనగలు, తోరాలు, సలిమిడి, చీర, రవికె వస్త్రం, యాలకులు, లవంగాలు ఉంచాలని పురాణ గ్రంథాలు తెలియజేస్తున్నాయి. వీలుకానివారు తులసి దళాలు, పసుపు కొమ్ము, వక్కలతో తాంబూలం ఇవ్వవచ్చు.