నర్సాపురం వద్ద వశిష్ఠ గోదావరి ఉధృతి; లంక గ్రామాలు జలమయం

పశ్చిమ గోదావరి జిల్లా నర్సాపురం సమీపంలో వశిష్ఠ గోదావరి నది ఉద్ధృతంగా ప్రవహిస్తోంది. లోతట్టు ప్రాంతాలు, లంక గ్రామాలు జలమయమయ్యాయి.

నరసాపురం నుండి సకిరేటిపల్లి రేవుల మధ్య పడవల రాకపోకలు నిలిపివేశారు. ఎలమంచిలి మండలం కనకాయలంక కాజ్వేపై వరద నీరు చేరడంతో పడవలు ఏర్పాటు చేశారు.

భద్రాచలం నుండి భారీగా వరద నీరు రావడంతో ఏలూరు జిల్లా వేలేరుపాడు, కుక్కునూరు మండలాల్లోని 28 గ్రామాలు ప్రభావితమయ్యాయి. సుమారు 9,000 మంది వరద నీటిలో చిక్కుకున్నారు. లోతట్టు ప్రాంత ప్రజలు కొండలపైకి తరలివెళ్లి పునరావాసం ఏర్పాటు చేసుకున్నారు. అధికారులు నిత్యావసర వస్తువులు అందుబాటులో ఉంచారు.

జాయింట్ కలెక్టర్, RDO ఆచంట, ఎలమంచలు మండలాల లంక గ్రామాలను సందర్శించి మెడికల్ క్యాంప్, నిత్యావసర వస్తువులు ఏర్పాటు చేశారు. NDRF, SDRF బృందాలు పరిస్థితికి అనుగుణంగా సహాయక చర్యలు నిర్వహిస్తున్నాయి.

ఇదే సమయంలో ఎద్దువాగు వద్ద ఒక వ్యక్తి ఈత కొడుతూ కనిపించకుండా పోయాడు. అతని కోసం గాలింపు చర్యలు కొనసాగుతున్నాయి.

ధవళేశ్వరం నుండి నరసాపురం వరకు లంక గ్రామాలు నీటితో చుట్టుముట్టాయి. లోతట్టు ప్రాంత ప్రజలను అధికారులు అప్రమత్తం చేశారు. లంక గ్రామాలకు రాకపోకలు పడవలపై ఆధారపడటంతో పడవలను నియంత్రించారు. నాటు పడవలు ఆశ్రయించవద్దని, గోదావరిలో చేపల వేటకు వెళ్లవద్దని హెచ్చరించారు.

కంట్రోల్ రూంలు ఏర్పాటు చేశారు. తహశీల్దార్లు, రెవెన్యూ అధికారులు, సిబ్బంది అందుబాటులో ఉన్నారు. జిల్లా కలెక్టర్ స్థాయిలో పర్యవేక్షణ కొనసాగుతోంది.