వట్టిచెరుకూరులో వందేళ్ల భూసమస్య పరిష్కారం, 550 కుటుంబాలకు న్యాయం

గుంటూరు జిల్లా ప్రత్తిపాడు నియోజకవర్గంలోని వట్టిచెరుకూరు గ్రామంలో 1906 నుంచి కొనసాగుతున్న భూయాజమాన్య సమస్యకు పరిష్కారం లభించింది.

1906లో రీసెటిల్మెంట్ రిజిస్టర్ సమయంలో జరిగిన పొరపాటుతో గ్రామం మొత్తం 112 ఎకరాలు (సర్వే నంబర్ 241) చెరువు పోరంబోకుగా రికార్డు చేశారు. అందులో 83 ఎకరాల చెరువుతోపాటు 25 ఎకరాల 37 కుంటల నివాస ప్రాంతం కూడా చెరువు పోరంబోకుగానే ఉండిపోయింది. ఈ 25 ఎకరాల్లో 550 కుటుంబాలు ఇళ్లు నిర్మించుకుని నివసిస్తున్నాయి. పన్నులు చెల్లిస్తున్నా 100 ఏళ్లుగా వీరు తమ ఇళ్లను రిజిస్ట్రేషన్ చేసుకోలేక, అమ్ముకోలేక ఇబ్బందులు పడ్డారు.

చాలాసార్లు రెవెన్యూ అధికారులను, ప్రభుత్వాలను గ్రామస్తులు విజ్ఞప్తి చేసినా పరిష్కారం లభించలేదు. ఇటీవల రాష్ట్ర మంత్రి అనగాని సత్యప్రసాద్ ఈ సమస్యపై దర్యాప్తు చేయాలని ఆదేశించారు. జిల్లా కలెక్టర్ విచారణ చేపట్టి నివేదిక సమర్పించారు. విచారణలో గ్రామ పంచాయతీ 1931లో ఏర్పాటైందని, నివాస ప్రాంతం చెరువుకు ఆనుకుని ఉన్నప్పటికీ దానికి సంబంధం లేదని తేలింది.

ఈ నివేదిక ఆధారంగా, రాష్ట్ర ప్రభుత్వం చీఫ్ సెక్రటరీ సాయి ప్రసాద్ ఉత్తర్వులతో సర్వే నంబర్ 241ను విభజించింది. 25 ఎకరాల నివాస భూమికి 241-3, 241-5 సర్వే నంబర్లను కేటాయించి నిషేధిత జాబితా నుండి తొలగించింది. దీంతో గ్రామస్థులు తమ ఇళ్లకు సంబంధించిన అన్ని హక్కులు పునరుద్ధరించుకోగలుగుతారు.

సమస్య పరిష్కారంపై గ్రామస్తులు సంతోషం వ్యక్తం చేశారు. కృతజ్ఞతగా స్థానికులు మంత్రి, ముఖ్యమంత్రి చంద్రబాబు నాయుడు చిత్రపటాలకు పాలాభిషేకం చేశారు. ఇకపై ఈ ప్రాంతంలో ఇళ్ల విక్రయం, రిజిస్ట్రేషన్ సులభతరం కానుంది.