కొత్త VB-G Ram పథకం: జూలైలో 50% తగ్గిన గ్రామీణ ఉపాధి పని దినాలు

జూలై 1 నుంచి అమల్లోకి వచ్చిన VB-G Ram పథకం ప్రారంభమైన తొలి నెలలోనే గ్రామీణ ఉపాధి పని దినాలు భారీగా తగ్గాయి. మహాత్మా గాంధీ జాతీయ గ్రామీణ ఉపాధి హామీ పథకం (MGNREGA) స్థానంలో కేంద్రం ఈ కొత్త పథకాన్ని తీసుకొచ్చింది. గతేడాది జూలైతో పోలిస్తే ఈ ఏడాది జూలైలో పని దినాలు దాదాపు 50% తగ్గాయి.

గతేడాది జూలైలో దేశవ్యాప్తంగా 15.33 కోట్ల పని దినాలు నమోదు కాగా, ఈ ఏడాది జూలైలో 7.67 కోట్ల పని దినాలకు పరిమితమైంది. పథకం నుంచి లబ్ధి పొందిన కుటుంబాల సంఖ్య కూడా సగానికి పడిపోయింది. గతేడాది 1.42 కోట్ల కుటుంబాలు పని చేస్తే, ఈసారి 68.94 లక్షల కుటుంబాలకే పని దొరికింది.

తెలంగాణలో కూడా ఉపాధి పనులకు వచ్చే కూలీల సంఖ్య బాగా తగ్గింది. ప్రస్తుతం రోజుకు 50,000 నుంచి 70,000 మంది మాత్రమే పనులకు హాజరవుతున్నారు. గతేడాది ఇదే సమయంలో రోజుకు 1.5 లక్షల నుంచి 2 లక్షల మంది పనులు చేసేవారు. గతంలో వేసవిలో రోజుకు 5 లక్షల నుంచి 8 లక్షల మంది వరకు పనులు వచ్చిన దాఖలాలూ ఉన్నాయి.

రాష్ట్రంలో ఈ ఏడాది ఇప్పటివరకు 3.16 లక్షల కుటుంబాలు పథకంలో పాల్గొన్నాయి. వీరికి 36.99 లక్షల పని దినాలు కల్పించారు. అయితే 71.4% కుటుంబాలకు కేవలం 1 నుంచి 14 రోజులే పని లభించింది. 15 నుంచి 30 రోజులు పని దొరికిన కుటుంబాలు 72,679 మాత్రమే. 31 నుంచి 50 రోజులు పని పొందింది 16,484 కుటుంబాలు మాత్రమే. నల్గొండ జిల్లా అత్యధికంగా 19,955 కుటుంబాలకు 2.36 లక్షల పని దినాలు కల్పించింది. సిద్దిపేట, ఖమ్మం జిల్లాలు తర్వాత స్థానాల్లో ఉన్నాయి.

పని దినాలు తగ్గడానికి పలు కారణాలు కనిపిస్తున్నాయి. నూతన పథకంలో డిజిటల్ హాజరు కోసం నేషనల్ మొబైల్ మానిటరింగ్ సిస్టమ్ యాప్ (NMSS) లో రోజుకు రెండుసార్లు హాజరు నమోదు చేయాల్సి ఉండటంతో, నెట్వర్క్ సమస్యలతో హాజరు నమోదు కావడం లేదు. ఆధార్ ఆధారిత చెల్లింపుల్లో జాప్యం, కేంద్రం నుంచి నిధులు ఆలస్యంగా రావడం వంటి టెక్నికల్ సమస్యలు కూడా ప్రభావం చూపుతున్నాయి. వ్యవసాయ సీజన్ నేపథ్యంలో కొన్ని రాష్ట్రాల్లో 60 రోజుల విరామ నిబంధన అమలు చేస్తున్నామని కేంద్రం చెబుతోంది. తెలంగాణలోని మారుమూల గిరిజన ప్రాంతాల్లో నెట్వర్క్ లేకపోవడంతో వేలాది మంది పనులకు వెళ్లలేకపోతున్నారు.