VD సతీశన్ కేరళ CM గా ప్రమాణం — 20 మంది మంత్రులు కూడా బాధ్యతలు చేపట్టారు

కేరళ కొత్త ముఖ్యమంత్రిగా VD సతీశన్ నేడు ప్రమాణ స్వీకారం చేశారు. తిరువనంతాపురంలోని సెంట్రల్ స్టేడియంలో ఉదయం 10 గంటలకు ఈ కార్యక్రమం జరిగింది. సతీశన్‌తో పాటు 20 మంది మంత్రులు కూడా ప్రమాణం చేశారు.

20 మంది మంత్రులలో 14 మంది తొలిసారిగా మంత్రి పదవి చేపడుతున్నారు. ఇద్దరు మహిళలకు, ఇద్దరు SC వర్గాలకు చెందిన వారికి మంత్రి పదవులు కల్పించినట్లు సతీశన్ తెలిపారు. సామాజిక, ప్రాంతీయ, మిత్రపక్షాల సమీకరణాలు పరిగణనలోకి తీసుకొని మంత్రులను ఎంపిక చేశారని చెప్పారు.

కాంగ్రెస్ సీనియర్ నేతలు రమేష్ చెన్నిత్తల, మురళీధరన్, KPCC చీఫ్ సన్నీ జోసెఫ్‌లు మంత్రివర్గంలో చేరారు. IUML కి ఐదు మంత్రి పదవులు దక్కాయి. IUML సీనియర్ నాయకుడు PK కున్హాలీకుట్టి, RSP నాయకుడు షిబు బాబీజాన్, కేరళ కాంగ్రెస్ నాయకులు మోన్స్ జోసెఫ్, అనూప్ జాకోబ్ కూడా మంత్రివర్గంలో చేరారు.

సీనియర్ MLA తిరువంచూర్ రాధాకృష్ణన్‌ను స్పీకర్ గా, షనిమోల్ ఉస్మాన్‌ను డెప్యూటీ స్పీకర్ గా నియమించాలని UDF నిర్ణయించింది.

ప్రమాణ స్వీకార కార్యక్రమానికి కాంగ్రెస్ అగ్రనేతలు రాహుల్ గాంధీ, మల్లికార్జున ఖర్గే, ప్రియాంక గాంధీ హాజరయ్యారు. తెలంగాణ CM రేవంత్ రెడ్డి, ఉపముఖ్యమంత్రి మల్లు భట్టి విక్రమార్క కూడా తిరువనంతాపురం వెళ్లారు.