CM సలహాదారు కొడుక్కి అసైన్డ్ భూములు: BRS నేత ఆరోపణ

BRS నేత మన్నె కృష్ణాంక్ తెలంగాణ ముఖ్యమంత్రి ప్రధాన సలహాదారు వేం నరేందర్ రెడ్డి కొడుకు వేం కృష్ణ భార్గవ్ రెడ్డి పేరు మీద అసైన్డ్ భూములు నమోదయ్యాయని ఆరోపించారు. భూభారతి పోర్టల్ ద్వారా ఈ భూముల యాజమాన్యం మార్చారని ఆయన పేర్కొన్నారు.

ఆయా రికార్డుల్లో మహబూబాబాద్ జిల్లా మాజీ కలెక్టర్ అద్వైత్ కుమార్ సింగ్, అదనపు కలెక్టర్, RDO సంతకాలు ఉన్నాయని కృష్ణాంక్ చెప్పారు. ఈ అసైన్డ్ భూములు SC, ST కేటగిరీకి చెందినవని, వాటిపై మైనింగ్ కార్యకలాపాలు జరుగుతున్నాయని ఆరోపించారు.

వేం నరేందర్ రెడ్డి TDP MLA, MLC అభ్యర్థిగా పోటీ చేసినప్పటి అఫిడవిట్‌లో ఈ భూములు లేవని, కాంగ్రెస్ ప్రభుత్వం రాగానే అఫిడవిట్‌లో అసైన్డ్ భూములు వచ్చేశాయని కృష్ణాంక్ పేర్కొన్నారు.

వేం నరేందర్ రెడ్డిని CMO నుండి తొలగించాలని, ఈ భూములు తిరిగి ప్రభుత్వానికి అప్పగించాలని, సిటింగ్ జడ్జి లేదా అసెంబ్లీ హౌస్ కమిటీ ద్వారా నిష్పాక్షిక విచారణ చేపట్టాలని కృష్ణాంక్ డిమాండ్ చేశారు. వారం రోజుల్లో చర్యలు తీసుకోవాలని ప్రభుత్వాన్ని కోరారు.

ఈ ఆరోపణలపై వేం నరేందర్ రెడ్డి, తెలంగాణ ప్రభుత్వం స్పందన తెలియాల్సి ఉంది.