VVIT గ్రాడ్యుయేషన్ డే: మాతృభాష, సంస్కృతి ప్రాముఖ్యతపై వెంకయ్య నాయుడు ప్రసంగం

గుంటూరు జిల్లా నంబూరులోని వాసిరెడ్డి వెంకటాద్రి ఇంటర్నేషనల్ టెక్నాలజికల్ యూనివర్సిటీ (VVIT)లో గ్రాడ్యుయేషన్ డే వేడుకలు నిర్వహించారు. ఈ కార్యక్రమానికి మాజీ ఉపరాష్ట్రపతి ఎం. వెంకయ్య నాయుడు, హైకోర్టు రిటైర్డ్ జస్టిస్ రామకృష్ణ ప్రసాద్ ముఖ్య అతిథులుగా హాజరయ్యారు.

ఈ సందర్భంగా వెంకయ్య నాయుడు మాట్లాడుతూ, ఉపరాష్ట్రపతి పదవి నుంచి విరమణ అనంతరం తాను రెండు లక్ష్యాలను నిర్దేశించుకున్నట్టు తెలిపారు. మొదటిది మాతృభాష ప్రాముఖ్యతను యువతకు వివరించడం, రెండవది భారతీయ సంస్కృతి, సంప్రదాయాలను తెలియజేయడమని ఆయన పేర్కొన్నారు.

విద్యార్థులను ఉద్దేశించి ఆయన మాట్లాడుతూ, తెలుగు భాష, భారతీయత గురించి గర్వపడాలని, సాంకేతికత ఎంత అభివృద్ధి చెందినా ప్రజా ప్రయోజనం లేకపోతే అర్ధం లేదని అన్నారు. కుటుంబ విలువలు, తల్లిదండ్రుల పట్ల గౌరవం, సమాజం పట్ల బాధ్యత ఉండాలని ఆయన సూచించారు. భారతదేశ అభివృద్ధిలో ప్రతి ఒక్కరూ సహకరించాలని, ప్రధాని మోదీ విజన్ 'వికసిత భారత్' సాధనలో యువత కలిసి రావాలని వెంకయ్య నాయుడు కోరారు.