వెంకటగిరి యువరాజు ఆధ్వర్యంలో RVM పాఠశాలలో మెగా ఉచిత వైద్య శిబిరం

వెంకటగిరి సంస్థానాధీశుల కుటుంబం నుంచి యువరాజా సర్వజ్ఞ కుమార కృష్ణ యాచేంద్ర ఆధ్వర్యంలో స్థానిక RVM ఉన్నత పాఠశాలలో మెగా ఉచిత వైద్య శిబిరం నిర్వహించారు. తాను చదివిన పాఠశాలలోనే ఈ శిబిరాన్ని ఏర్పాటు చేసి ముఖ్య అతిథిగా పాల్గొన్నారు.

ఆయనతో పాటు తమ కళాశాలలో విద్యనభ్యసించిన పూర్వ విద్యార్థులు, ప్రస్తుతం తిరుపతిలోని ఒక ప్రైవేట్ కార్పొరేట్ హాస్పిటల్లో వైద్యులుగా సేవలందిస్తున్నారు. స్థానిక వైద్యుడు కిరణ్ సహకారంతో ఈ శిబిరం ద్వారా తమ సొంత గ్రామాల ప్రజలకు నాణ్యమైన వైద్య సేవలు అందించాలని సంకల్పించారు.

ఈ సందర్భంగా యువరాజా మాట్లాడుతూ, తమ పూర్వీకులు సొంత నిధులతో మహిళల కోసం మెటర్నిటీ హాస్పిటల్, పురుషుల కోసం పెద్ద హాస్పిటల్ ఏర్పాటు చేశారని గుర్తు చేశారు. కాలక్రమేణా ప్రభుత్వం ఈ హాస్పిటళ్లను స్వాధీనం చేసుకున్నా, వెంకటగిరిలో ఇప్పటికీ కార్పొరేట్ స్థాయి వైద్య సదుపాయాలు లేవని, దీంతో ప్రజలు తిరుపతి, నెల్లూరు లేదా చెన్నై వరకు వెళ్లాల్సి వస్తోందని వివరించారు. గ్రామీణ ప్రాంతాలకు నాణ్యమైన వైద్యం అందించాలనే లక్ష్యంతో ఈ శిబిరం నిర్వహించినట్లు తెలిపారు.