రాజమండ్రి మెడికో ప్రియాంక కేసు: తండ్రి వెంకటేష్ మీడియాకు విజ్ఞప్తి

రాజమండ్రిలో మద్యం మత్తులో యువకులు కారు ఢీకొట్టడంతో మెడికో విద్యార్థి ప్రియాంక మరణించింది. ఈ కేసులో పోలీసుల దర్యాప్తు నిజాయితీగా, సంతృప్తికరంగా ఉందని ఆమె తండ్రి వెంకటేష్ తెలిపారు.

తన కుమార్తెను కోల్పోయిన బాధలో ఉండగా, కొన్ని ఛానళ్ళు తన మాటలను వక్రీకరించి రాజకీయ రంగు పులిమినట్టు ప్రసారం చేయడం మరింత బాధ కలిగించిందని వెంకటేష్ ఆవేదన వ్యక్తం చేశారు. తాను ఎక్కడా ప్రభుత్వం లేదా పోలీసులను తప్పు పట్టలేదని, ఏలూరు ఐజీ, సీఎం పీఏ రాజబాబు గారితో మాట్లాడిన వివరాలను కొన్ని ఛానళ్ళు తప్పుగా అర్థం చేసుకున్నాయని ఆయన స్పష్టం చేశారు.

పోలీసులు తమకు కేసు సెక్షన్లు, శిక్ష పడేలా చట్టపరమైన చర్యలు వివరించారని, వారి కృషి పట్ల తాము సంతోషంగా ఉన్నామని వెంకటేష్ చెప్పారు. మీడియా వాస్తవాలు అర్థం చేసుకుని, బాధిత కుటుంబాన్ని ఇంకా బాధ పెట్టవద్దని చేతులెత్తి వేడుకున్నారు.