పోయస్ గార్డెన్ కొనుగోలుపై తమిళనాడు సీఎం విజయ్ ఆసక్తి

తమిళనాడు ముఖ్యమంత్రి విజయ్ తన అధికారిక నివాసాన్ని మార్చేందుకు నిర్ణయించుకున్నట్లు తెలుస్తోంది. ప్రస్తుతం చెన్నై శివార్లలోని నీలాంకరైలో ఉంటున్న ఆయన, సచివాలయానికి 18 కిలోమీటర్ల దూరం ప్రయాణించాల్సి వస్తోంది. దీంతో రోజూ పీక్ అవర్స్‌లో తీవ్రమైన ట్రాఫిక్ జామ్ ఏర్పడుతోందని, ప్రజలకు ఇబ్బంది కలుగుతోందని సమాచారం. విజయ్ స్వయంగా ఈ సమస్యను గమనించి, సచివాలయానికి దగ్గరలో నివాసం ఏర్పాటు చేసుకోవాలని భావిస్తున్నారు.

ఈ క్రమంలో దివంగత ముఖ్యమంత్రి జయలలిత నివసించిన 'వేద నిలయం' (పోయస్ గార్డెన్)పై ఆయన దృష్టి పడింది. జయలలిత మేనకోడలు దీప నుంచి ఈ భవనాన్ని సుమారు రూ.350 కోట్లకు కొనుగోలు చేయడానికి చర్చలు సాగుతున్నట్లు తమిళనాడు రాజకీయ వర్గాల సమాచారం. సచివాలయానికి కేవలం 8 కిలోమీటర్ల దూరంలో ఈ నివాసం ఉండడం విజయ్‌ను ఆకర్షించిన ప్రధాన అంశం. అయితే ఈ డీల్‌పై విజయ్ బృందం గానీ, దీప గానీ ఇప్పటివరకు ఎలాంటి అధికారిక ప్రకటన చేయలేదు.

పోయస్ గార్డెన్ ప్రాంతంలోనే నటుడు రజనీకాంత్ కూడా నివసిస్తున్నారు. గతంలో జయలలిత సీఎంగా ఉన్నప్పుడు భద్రతా కారణాలతో రజనీకాంత్ వాహనాన్ని పోలీసులు ఆపిన సందర్భాలు ఉన్నాయి. విజయ్ అదే ప్రాంతానికి మారితే రాజకీయ సమీకరణాలు ఎలా ఉంటాయనే చర్చ తమిళనాడులో మొదలైంది. రజనీకాంత్ విజయ్ ను అధికారికంగా అభినందించలేదని టీవీకే శ్రేణులు అసంతృప్తిగా ఉన్నట్లు కూడా ప్రచారం జరుగుతోంది.