ఈశ్వరమ్మ వివాదం కాంగ్రెస్ అంతర్గత వ్యవహారం, ఇతర పార్టీల జోక్యం వద్దన్న జగ్గారెడ్డి

తెలంగాణ కాంగ్రెస్ పార్టీలో చోటుచేసుకున్న ఈశ్వరమ్మ, శివచరణ్ రెడ్డి వివాదంపై పీసీసీ కమిటీ సమావేశమైంది. కమిటీ ఇరువర్గాల వాదనలను విన్నట్లు తెలిసింది. ఈ సందర్భంగా మాట్లాడిన సీనియర్ నేత జగ్గారెడ్డి, ఈ వ్యవహారం తమ పార్టీ అంతర్గత అంశమని స్పష్టం చేశారు.

ఇతర పార్టీల నాయకులు ఈ వివాదంలో జోక్యం చేసుకోవడం సరికాదని ఆయన వ్యాఖ్యానించారు. ముఖ్యమంత్రి రేవంత్ రెడ్డి చొరవతో ఈశ్వరమ్మను ఒక ప్రభుత్వ సంస్థ డైరెక్టర్‌గా నియమించినట్లు జగ్గారెడ్డి ప్రస్తావించారు. అదే విధంగా, చరణ్ రెడ్డి, ప్రభాకర్ రెడ్డిలు నాలుగు దశాబ్దాలుగా కాంగ్రెస్ పార్టీ కార్యకర్తలుగా పనిచేస్తున్నారని తెలిపారు.

ప్రతిపక్షాలు ఈ అంశాన్ని రాజకీయంగా వాడుకోవడానికి ప్రయత్నిస్తున్నాయని ఆరోపించిన జగ్గారెడ్డి, పార్టీ కార్యకర్తలు ఈ గొడవలకు స్వస్తి పలకాలని సూచించారు. యాదవ, రెడ్డి, గౌడ సామాజిక వర్గాలకు చెందిన సభ్యుల మధ్య అనవసర విభేదాలు రాకుండా అప్రమత్తంగా ఉండాలని నాయకులకు సూచించినట్లు సమాచారం.