గంజాయి రహిత ఏపీ లక్ష్యంగా ‘పల్లెబాటలో ఈగల్’ ప్రచారం ప్రారంభం

ఆంధ్రప్రదేశ్‌లో గంజాయి రహిత లక్ష్యం కోసం రాష్ట్ర పోలీసులు ‘పల్లెబాటలో ఈగల్’ (Eagle) పేరుతో ప్రత్యేక విస్తృత ప్రచార కార్యక్రమం ప్రారంభించారు. 1972లో విడుదలైన ‘అరణ్యకాండ’ చిత్ర కథను ఆధారంగా చేసుకుని నేటి పరిస్థితులకు అనుగుణంగా ఈ కార్యక్రమాన్ని రూపొందించినట్లు పోలీసులు తెలిపారు. IPS అధికారి పి. శ్రీ హర్షవర్ధన ఈ ప్రచారాన్ని నిర్వహిస్తున్నారు. విశాఖపట్నం జిల్లా నుంచి ప్రారంభమైన ఈ కార్యక్రమం ఆగస్టు 20 వరకు రాష్ట్రవ్యాప్తంగా కొనసాగుతుంది.

పోలీసుల బహుముఖ వ్యూహంలో డ్రోన్ నిఘా, ఉపగ్రహ సాంకేతికత, కార్డినల్ సెర్చ్ ఆపరేషన్లు, విస్తృత అవగాహన ప్రచారాలు, NDPS చట్టాన్ని కఠినంగా అమలు చేయడంతో పాటు రైతులకు ప్రత్యామ్నాయ పంటల సహాయం అందించడం ఉన్నాయి. గత సంవత్సరం 35,000 ఎకరాల్లో గంజాయి సాగుకు బదులు 25 వేల మంది రైతులకు 21 రకాల ప్రత్యామ్నాయ విత్తనాలు పంపిణీ చేశారు. ఈ పథకంలో రైతులు విజయవంతమయ్యారని అధికారులు చెప్పారు. ఈ బహుముఖ విధానంతో గంజాయి సాగు సున్నాకు తగ్గిందని, NCB న్యూఢిల్లీ ఆంధ్రప్రదేశ్‌ను బెస్ట్ ప్రాక్టీసింగ్ స్టేట్‌గా గుర్తించి, ఈ మోడల్‌ను ఇతర రాష్ట్రాలు అనుసరించాలని సూచించింది.

గంజాయి సరఫరా ఎక్కువగా ఒడిశాలోని మల్కన్‌గిరి, కోరాపుట్ జిల్లాల నుంచి అక్రమంగా వస్తున్నట్లు సమాచారం. దీన్ని నియంత్రించేందుకు సరిహద్దు ప్రాంతాల్లో డైనమిక్ చెక్‌పోస్టులు ఏర్పాటు చేశారు. ఒడిశా యాంటీ టెర్రరిజం ఫోర్స్‌తో ఇంటెలిజెన్స్ షేరింగ్ చేస్తూ సరఫరాను అడ్డుకుంటున్నామని పోలీసులు తెలిపారు. గంజాయి అక్రమ కార్యకలాపాలపై సమాచారం ఇచ్చే వారికి పూర్తి గోప్యత, చట్టపరమైన రక్షణ కల్పిస్తామని, గంజాయి రహిత ఆంధ్రప్రదేశ్ నిర్మాణంలో ప్రజలు భాగస్వాములు కావాలని పోలీసు ఉన్నతాధికారులు విజ్ఞప్తి చేశారు.