తెనాలిలో అక్రమ గ్యాస్ సిలిండర్ల దందా: 47 సిలిండర్లు స్వాధీనం, పోలీసులకు ఫిర్యాదు

గుంటూరు జిల్లా తెనాలిలో అధికారులు అక్రమ గ్యాస్ సిలిండర్ల దందాను గుట్టురట్టు చేశారు. తెనాలి తాసీల్దార్ గోపాలకృష్ణ నేతృత్వంలో జరిగిన తనిఖీల్లో మొత్తం 47 సిలిండర్లు స్వాధీనం చేసుకున్నారు.

తెనాలి బస్టాండ్ సమీపంలోని షాపుల్లో అక్రమంగా గ్యాస్ సిలిండర్లు నిల్వ చేసి విక్రయిస్తున్నారనే సమాచారంతో తాసీల్దార్ దాడులు నిర్వహించారు. మొదట ఒక చోట 7 సిలిండర్లను గుర్తించారు. చుట్టుపక్కల ప్రాంతాన్ని గాలించగా మొత్తం 27 సిలిండర్లు ఒకే ప్రాంతంలో బయటపడ్డాయి.

ఇదే సమయంలో పాండురంగపేటలోని ఒక గ్యాస్ స్టవ్ రిపేర్ దుకాణంలో మరో 20 సిలిండర్లు కనిపించాయి. ఇందులో రెండు కమర్షియల్ సిలిండర్లు ఉన్నాయని అధికారులు తెలిపారు.

తాసీల్దార్ గోపాలకృష్ణ మాట్లాడుతూ, "డొమెస్టిక్ గ్యాస్ సిలిండర్లను బ్లాక్ మార్కెట్లో విక్రయించడం నేరం. ఈ వ్యవహారంపై పోలీసులకు ఫిర్యాదు చేస్తాం. సిలిండర్లు ఎలా వచ్చాయి, ఈ దందా వెనుక ఎవరున్నారనేది దర్యాప్తు చేస్తాం" అని చెప్పారు.