విజయవాడ GGH లో కోవిడ్ వార్డు సిద్ధం: సూపరింటెండెంట్ రఘునందన్ రావు వివరణ

ఆంధ్రప్రదేశ్‌లో కోవిడ్ కేసులు పెరుగుతున్న నేపథ్యంలో విజయవాడ ప్రభుత్వ జనరల్ హాస్పిటల్ అన్ని విధాలా సిద్ధంగా ఉందని GGH సూపరింటెండెంట్ రఘునందన్ రావు తెలిపారు. ఆరోగ్య శాఖ మంత్రి, సెక్రెటరీ, DME మరియు కలెక్టర్ ఆదేశాల మేరకు ప్రత్యేక ఐసోలేషన్ వార్డు ఏర్పాటు చేశారని ఆయన వివరించారు.

ప్రస్తుతం 15 బెడ్లతో కూడిన ఐసోలేషన్ వార్డు అందుబాటులో ఉంది. అనుమానిత మరియు నిర్ధారిత కోవిడ్ కేసులకు రోగ నిర్ధారణ, చికిత్స సదుపాయాలు కల్పించారు. తీవ్రమైన కేసులకు ప్రత్యేకంగా మరో వార్డు సిద్ధం చేయడం జరిగింది. మొత్తంగా 21 బెడ్లు సిద్ధంగా ఉన్నాయి.

పరీక్షల కోసం RTPCR కిట్లు మరియు రాపిడ్ యాంటిజన్ టెస్ట్ కిట్లు సమకూర్చుకుంటున్నారు. స్థానికంగా 50 కిట్లు తక్షణమే కొనుగోలు చేయడానికి ఏర్పాట్లు చేస్తున్నారు. లిక్విడ్ మెడికల్ ఆక్సిజన్ మరియు ఆక్సిజన్ కాన్సంట్రేటర్లు అందుబాటులో పెట్టారు. తీవ్రమైన కేసులకు ప్రభుత్వ అనుమతితో రెమిడెసివర్ ఇంజెక్షన్ ఇచ్చేందుకు సిద్ధంగా ఉన్నారు.

పల్మనాలజీ, జనరల్ మెడిసిన్, నెఫ్రాలజీ, కార్డియాలజీ విభాగాల సిబ్బంది అందరికీ అవసరమైన సూచనలు ఇవ్వడం జరిగింది. ఇన్ఫెక్షన్ కంట్రోల్ నర్సింగ్ ప్రొటోకాల్స్ అన్నీ తప్పనిసరిగా పాటించాలని ఆదేశాలు జారీ చేశారు.

గత నాలుగు నెలల్లో విజయవాడ నుంచి తీసిన 47 శాంపుల్స్ అన్నీ నెగటివ్ గా వచ్చాయని రఘునందన్ రావు తెలిపారు. వేసవి వేడిమి వల్ల కోవిడ్ వ్యాప్తి తక్కువగా ఉంటుందని, చలికాలం మరియు వర్షాకాలంలో వ్యాప్తి పెరిగే అవకాశం ఉంటుందని ఆయన వివరించారు. దగ్గు, జలుబు, జ్వరం, ఆయాసం వంటి లక్షణాలు కనిపిస్తే వెంటనే GGH విజయవాడని సంప్రదించాలని ప్రజలకు సూచించారు. ప్రజలు ఎటువంటి భయాందోళనలకు గురి కావాల్సిన అవసరం లేదని ఆయన స్పష్టం చేశారు.