విజయవాడ: బైపాస్ ప్రారంభించినా భారీ వాహనాలు నగరంలోకే - ట్రాఫిక్ ఇబ్బందులు

విజయవాడ పశ్చిమ బైపాస్‌ను ప్రారంభించి మూడు నెలలు గడిచినా భారీ వాహనాలు నగరంలోకి రావడం కొనసాగుతోంది. బైపాస్‌పై టోల్ చార్జీలను తప్పించుకునేందుకు రాత్రి 7 గంటల తర్వాత లారీలు, కంటైనర్లు సిటీ రోడ్లపైకి వస్తున్నాయి.

చిన్న ఊటుపల్లి నుంచి గొల్లపూడి మీదుగా కాజా వరకు ఉన్న ఈ బైపాస్‌ను ఉపయోగించకుండా నేరుగా నగరంలోకి ప్రవేశిస్తుండడంతో బెంజ్ సర్కిల్, రామవరపాడు ప్రాంతాల్లో తీవ్ర ట్రాఫిక్ జామ్ ఏర్పడుతోంది. రాత్రి సమయంలో పోలీసులు చాలా తక్కువ సంఖ్యలో ఉండటం వల్ల నియంత్రణ సాధ్యం కావడం లేదు.

ఆదివారం రాత్రి 8 గంటలకు ఈటీవీ ప్రతినిధులు చిన్న ఊటుపల్లి వద్ద గమనించగా ఇద్దరు ట్రాఫిక్ సిబ్బంది కొన్ని లారీలను బైపాస్ వైపు మళ్లించారు. కానీ వారు డ్యూటీ ముగించుకుపోయిన వెంటనే మళ్లీ భారీ వాహనాలు నగరంలోకి దూసుకొచ్చాయి.

బెంజ్ సర్కిల్ వద్ద ప్రైవేట్ ట్రావెల్స్ బస్సులు రోడ్డుపై ఆపడం వల్ల కూడా ట్రాఫిక్ స్తంభించిపోతోంది. స్థానిక వాహనదారులు, నివాసితులు భారీ వాహనాల ప్రవేశాన్ని నియంత్రించాలని అధికారులను డిమాండ్ చేస్తున్నారు.