విజయవాడ ఇందిరా గాంధీ స్టేడియం ఆధునికీకరణ పనులు జోరు; రూ.40 కోట్లతో పునర్నిర్మాణం

విజయవాడలోని ఇందిరా గాంధీ మున్సిపల్ స్టేడియం ఆధునికీకరణ పనులు జోరుగా సాగుతున్నాయి. దాదాపు రూ.40 కోట్ల వ్యయంతో ఈ స్టేడియంను అంతర్జాతీయ స్థాయిలో తీర్చిదిద్దుతున్నారు.

ఈ ఆధునికీకరణలో భాగంగా 400 మీటర్ల 8 లైన్ల సింథెటిక్ అథ్లెటిక్ ట్రాక్ ఏర్పాటు చేస్తున్నారు. ఫ్లడ్ లైట్లతో కూడిన ఫుట్బాల్ గ్రౌండ్, సింథెటిక్ టెన్నిస్ కోర్టులు కూడా రానున్నాయి. ఇండోర్ మల్టీ ప్రపస్ హాల్, 300 మందికి హాస్టల్ వసతి, పరిపాలన భవనం నిర్మాణంలో ఉన్నాయి.

ప్రాజెక్టుకు కేంద్ర క్రీడా అథారిటీ, మున్సిపాలిటీ నుండి రూ.20 కోట్లు కేటాయించినట్టు SAP చైర్మన్ రవినాయుడు తెలిపారు. టెండర్ల ప్రక్రియ పూర్తయి, తొలి దశ పనులు వేగంగా కొనసాగుతున్నాయి.

ఒకప్పుడు అంతర్జాతీయ క్రికెట్ మ్యాచ్లకు ఆతిథ్యం ఇచ్చిన ఈ స్టేడియం, కాలక్రమేణ క్రీడలకు దూరమైంది. రాజకీయ, వాణిజ్య కార్యక్రమాలకే పరిమితమైంది. అంతర్జాతీయ ప్రమాణాల స్టేడియం లేదని స్థానికులు, క్రీడాకారులు ఆవేదన వ్యక్తం చేస్తున్న నేపథ్యంలో ప్రభుత్వం ఈ పునర్నిర్మాణం చేపట్టింది.

ఆధునికీకరణ పూర్తయితే ఈ స్టేడియం జాతీయ, అంతర్జాతీయ క్రీడా పోటీలకు వేదికగా మారనుందని రవినాయుడు చెప్పారు. ఇందిరా గాంధీ స్టేడియం విజయవాడ క్రీడా రంగానికి పునరుజ్జీవనం తేనుంది.