విజయవాడ ఇంద్రకీలాద్రిలో ఇన్‌స్టాగ్రామ్ రీల్స్‌పై ఆలయ అధికారుల ఫిర్యాదు

విజయవాడలోని ఇంద్రకీలాద్రి దుర్గగుడిలో ఇన్‌స్టాగ్రామ్ రీల్స్ ఘటనపై ఆలయ అధికారులు పోలీసులను ఆశ్రయించారు. సెల్‌ఫోన్ వినియోగంపై నిషేధం ఉండగా, ఓ మహిళ పెద్ద రాజగోపురం వద్ద రీల్స్ తీసి ఇన్‌స్టాగ్రామ్‌లో పోస్ట్ చేసినట్లు ఆలయ వర్గాలు తెలిపాయి.

ఈ ఘటన తర్వాత దుర్గగుడి ఛైర్మన్ కార్యాలయం ఎదురుగానే రీల్స్ జరుగుతున్నా భద్రతా సిబ్బంది గుర్తించకపోవడంపై భక్తులు తీవ్ర అసంతృప్తి వ్యక్తం చేశారు. కీలక ప్రదేశంలో భద్రతా సిబ్బంది ఏమయ్యారని ప్రశ్నించారు. విమర్శల నేపథ్యంలో ఆలయ అధికారులు అప్రమత్తమై పోలీసులకు ఫిర్యాదు చేసి, బాధ్యులపై చట్టపరమైన చర్యలు తీసుకోవాలని కోరారు.

గతంలో కూడా అమ్మవారి మూల విరాట్ వీడియోలు తీసి సోషల్ మీడియాలో పెట్టిన సంఘటనలు వెలుగులోకి వచ్చాయి. వరుస వివాదాలతో దుర్గగుడి ప్రతిష్ట దెబ్బతింటుందని భక్తులు ఆందోళన చెందుతున్నారు.