విజయవాడ కనకదుర్గమ్మ ఆలయంలో నూతన అన్నప్రసాద సదనం, మహాప్రసాద భవనం ప్రారంభం

విజయవాడ ఇంద్రకీలాద్రిపై కనకదుర్గమ్మ ఆలయంలో రెండు నూతన భవనాలు ఇవాళ ప్రారంభోత్సవానికి సిద్ధమయ్యాయి. వీటిలో అన్నప్రసాద సదనం, మహాప్రసాద భవనం ఉన్నాయి.

దేవాదాయ శాఖ మంత్రి ఆనం రామనారాయణ రెడ్డి ఉదయం 11:32 గంటలకు ఈ భవనాలను ప్రారంభించనున్నారు. వీటిని ₹56 కోట్ల వ్యయంతో నిర్మించారు. అన్నదాన భవనంలో ఒకేసారి 800 మంది భక్తులు భోజనం చేసే సౌకర్యం ఉంది.

భక్తుల సంఖ్య గణనీయంగా పెరగడంతో ఆలయ యాజమాన్యం ఈ నూతన భవనాలను నిర్మించింది. ఆలయ ప్రధాన అర్చకులు దుర్గా ప్రసాద్ మాట్లాడుతూ, ప్రస్తుతం రోజుకు 8,000 నుంచి 10,000 మందికి అన్నదానం చేస్తున్నట్టు తెలిపారు. కొత్త భవనాలతో ఈ సంఖ్యను మరింత పెంచుతామన్నారు. భక్తుల కోసం వెయిటింగ్ హాళ్లు కూడా ఏర్పాటు చేశారు.

ఇప్పటివరకు ప్రసాదం తయారీ దూరంగా జరిగేది. ఇకపై ఆలయ ప్రాంగణంలోనే లడ్డు, పులిహార తయారు చేస్తారు. దసరా నాటికి ఈ భవనాలు పూర్తి స్థాయిలో వినియోగంలోకి వస్తాయని ఆలయ వర్గాలు తెలిపాయి.