విజయవాడ సాయి కృష్ణ మృతి కేసు: శవం మాయం వ్యవహారంలో SIT విచారణ ముమ్మరం

విజయవాడ కృష్ణలంకకు చెందిన సాయి కృష్ణ మృతి, మృతదేహం మాయం వ్యవహారంలో ప్రత్యేక దర్యాప్తు బృందం (SIT) విచారణ వేగవంతం చేసింది.

సాయి కృష్ణ కస్టడీలోనే మరణించినట్లు రిమాండ్ రిపోర్ట్ లో పేర్కొంది. మృతదేహాన్ని ఏం చేశారు, ఎక్కడ పడేశారు అనే విషయాలపై SIT లోతుగా దర్యాప్తు చేస్తోంది.

కృష్ణలంక పోలీస్ స్టేషన్ లోని 60 మంది సిబ్బందిని SIT ప్రశ్నిస్తూ స్టేట్‌మెంట్లు రికార్డ్ చేస్తోంది. ఈ ఘటనలో ఎవరి పాత్ర ఉందో తెలుసుకోవడానికి ప్రతి ఒక్కరినీ విచారిస్తున్నారు.

స్టేషన్ లో సీఐ నాగరాజుకు అనుచరులుగా ఉండే ఇద్దరు సిబ్బంది పాత్ర ఉన్నట్లు ప్రాథమికంగా గుర్తించారు. వీరిలో ఒకరు ఏడేళ్ళుగా ఈ స్టేషన్ లో పనిచేస్తుండగా, మరొకరు ఏడాది క్రితం వచ్చారు. SIT ఏర్పాటు తర్వాత వీరు డ్యూటీలకు రావడం లేదు.

కొందరు టాస్క్‌ఫోర్స్ సిబ్బందిని కూడా పిలిచి విచారిస్తున్నారు. వీరి నుంచి కీలక ఆధారాలు లభించే అవకాశం ఉందని అధికారులు భావిస్తున్నారు. సాయి కృష్ణ కుటుంబ సభ్యులు సిబ్బంది పాత్రపై వివరాలు అందజేశారు.

ఇదే కేసులో నిందితుడు సీఐ నాగరాజు నుంచి మరింత సమాచారం రాబట్టేందుకు 12 రోజుల కస్టడీకి ఇవ్వాలని SIT అధికారులు కోర్టులో పిటిషన్ దాఖలు చేశారు. నాగరాజు తరపు న్యాయవాది సమయం కోరడంతో కోర్టు ఈ పిటిషన్‌పై విచారణ 29వ తేదీకి వాయిదా వేసింది.