విజయవాడలో తార్ జీపులతో రోడ్డుపై బీభత్సం: ఇద్దరు యువకులకు జూన్ 5 వరకు రిమాండ్

విజయవాడలో నడి రోడ్డుపై తార్ జీపులతో బీభత్సం సృష్టించిన ఇద్దరు యువకులకు న్యాయాధికారి జూన్ 5 వరకు రిమాండ్ విధించారు. విజయవాడ నాలుగో అదనపు జూనియర్ సివిల్ జడ్జి కోర్టు న్యాయాధికారి రామ్మోహన్ ఈ ఉత్తర్వులు ఇచ్చారు. పోలీసులు నిందితులను విజయవాడ జిల్లా జైలుకు తరలించారు.

నిందితులు రాడ్లు, బేస్బాల్ బ్యాట్లతో జీపుల్లో వచ్చి రోడ్డుపైకి దిగారని ప్రభుత్వ న్యాయవాది శివప్రసాద్ కోర్టుకు వివరించారు. వాహనాలు ఒకదానికొకటి డీ కొట్టుకున్నారని, వాహనాల అద్దాలు పగలగొట్టారని తెలిపారు. అక్కడున్న వారు భయంతో పరుగులు తీశారని పేర్కొన్నారు. ఫిర్యాదుదారు కొండలరావు వారిని ఆపేందుకు ప్రయత్నించగా నిందితులు ఆయన్ను బెదిరించారని కోర్టు దృష్టికి తెచ్చారు.

నిందితుల తరఫు న్యాయవాది వాదిస్తూ క్షణికావేశంలో జరిగిందని, చంపుకోవాలనే ఉద్దేశం లేదని తెలిపారు. వారు విద్యార్థులని, భవిష్యత్తు దృష్టిలో ఉంచుకుని ఆదేశాలు ఇవ్వాలని కోరారు. హత్యాయత్నం సెక్షన్ ఈ కేసుకు వర్తించదని వాదించారు.

న్యాయాధికారి రామ్మోహన్ నిందితుల చర్యను తీవ్రంగా పరిగణించారు. ఘటన వీడియో దృశ్యాలను పెన్ డ్రైవ్ ద్వారా కోర్టుకు సమర్పించగా, న్యాయాధికారి కోర్టు హాలులో వాటిని చూశారు. "ఈ చర్య ప్రపంచమంతా చూసింది. మీ చదువు ఏమైంది" అని నిందితులను నిలదీశారు. రిమాండ్ విధించేందుకు తగిన ఆధారాలు ఉన్నాయని స్పష్టం చేశారు.

కోర్టు బయట నిందితుల్లో ఒకరి తల్లి అసంతృప్తి వ్యక్తం చేశారు. కలిసి ఉండాల్సిన వారు ఇలాంటి పని చేస్తారని ప్రశ్నించారు. ఇద్దరూ ఇకపై కలిసే ఉండాలని ఒట్టు వేయించుకున్నారు.