విజయవాడ అర్బన్ స్ట్రీట్ ఫర్నిచర్ పథకం: నిర్మాణాలు పూర్తయినా వినియోగం శూన్యం

విజయవాడ నగరపాలక సంస్థ కొన్నేళ్ల క్రితం అర్బన్ స్ట్రీట్ ఫర్నిచర్ పథకాన్ని ప్రారంభించింది. దక్షిణ భారతంలో తొలిసారిగా, దేశంలో మొదటిసారిగా విజయవాడలో ఈ పథకాన్ని అమలు చేశారు. కేంద్ర పట్టణాభివృద్ధి మంత్రిత్వ శాఖ ఈ విధానాన్ని అందుబాటులోకి తెచ్చింది.

MG రోడ్, ఏలూరు రోడ్, బందర్ రోడ్, రామవరపాడు రోడ్ సహా ప్రధాన రోడ్లలో పదుల సంఖ్యలో స్టీల్ స్ట్రీట్ ఫర్నిచర్ నిర్మాణాలు ఏర్పాటు చేశారు. వెండింగ్ కియోస్కులు, పోలీస్ బూత్, LED లైటింగ్, చెత్తకుండీలు, బెంచిలు ఈ సముదాయంలో భాగంగా ఉన్నాయి.

BOT విధానంలో ప్రకాష్ ఆర్ట్స్ సంస్థ టెండర్ దక్కించుకుని నిర్మాణాలు పూర్తి చేసింది. 15 సంవత్సరాల పాటు ప్రకటనల ద్వారా వచ్చే ఆదాయం ఆ సంస్థకు వెళ్లాలని ఒప్పందం జరిగింది. తర్వాత ఈ నిర్మాణాలు నగరపాలక సంస్థ ఆధీనంలోకి వస్తాయని అప్పట్లో నిర్ణయించారు.

అయితే వెండింగ్ కియోస్కులు ఒక్కచోట కూడా ఇప్పటివరకు తెరుచుకోలేదు. పోలీస్ బూత్, LED లైటింగ్ సదుపాయాలు వినియోగంలోకి రాలేదు. చాలా చోట్ల కియోస్కుల షట్టర్లు దెబ్బతిన్నాయి. బస్ స్టాప్ల వద్ద రేకులు ఊడిపోయి వేలాడుతున్నాయి. చెత్తకుండీలు విరిగిపోయాయి. LED లైటింగ్ స్తంభాలు అలంకారప్రాయంగా మిగిలిపోతున్నాయి.

ప్రకాష్ ఆర్ట్స్ సంస్థ ప్రకటనలు ప్రదర్శిస్తోంది. కానీ ఇతర సదుపాయాలు అందుబాటులోకి రాలేదు. నగరపాలక సంస్థ అధికారులు పర్యవేక్షణ చేయడం లేదని నగరవాసులు చెప్తున్నారు. ఈ సదుపాయాలు వినియోగంలోకి తీసుకురావాలని నగరవాసులు విజ్ఞప్తి చేస్తున్నారు.