విశాఖలో 31వ CII పార్టనర్‌షిప్ సమ్మిట్: ₹11 లక్షల కోట్ల పెట్టుబడుల లక్ష్యం

విశాఖపట్నంలో 31వ CII పార్టనర్‌షిప్ సమ్మిట్ రెండు రోజుల పాటు జరగనుంది. ఆంధ్రా యూనివర్సిటీ మైదానంలో ఈ సదస్సుకు ఏర్పాట్లు పూర్తయ్యాయి. ఈ సమ్మిట్ ద్వారా ₹11 లక్షల కోట్ల పెట్టుబడులు ఆకర్షించడమే లక్ష్యమని రాష్ట్ర ప్రభుత్వం చెబుతోంది.

సదస్సుకు 58 దేశాల నుంచి ప్రతినిధులు వస్తున్నారు. 15 మంది విదేశీ మంత్రులు హాజరవుతున్నారు. సుమారు 1,250 మంది పారిశ్రామికవేత్తలు పాల్గొంటారు. 400కు పైగా B2B ఒప్పంద సమావేశాలు, 50కి పైగా సెషన్లు ఏర్పాటు చేశారు. ఆరు ప్రధాన అంశాలపై ఇక్కడ చర్చ జరుగుతుంది.

సెమీకండక్టర్లు, ఎలక్ట్రానిక్స్, AI, క్వాంటం కంప్యూటింగ్, గ్రీన్ ఎనర్జీ, ఫార్మా, లాజిస్టిక్స్ రంగాలపై సదస్సు దృష్టి పెడుతోంది. పారిశ్రామిక రాయితీలను escrow ఖాతాల ద్వారా పారదర్శకంగా చెల్లిస్తున్నట్టు ప్రభుత్వం తెలిపింది. Speed of Doing Business విధానాలతో పెట్టుబడిదారుల నమ్మకాన్ని పెంచుతున్నట్టు చెబుతోంది. గత సదస్సులో కుదిరిన ఒప్పందాల్లో 70 శాతానికి పైగా అమల్లోకి వచ్చాయని ప్రభుత్వ వర్గాలు పేర్కొన్నాయి.

సదస్సును కేంద్ర మంత్రి అమిత్ షా ప్రారంభిస్తారు. కేంద్ర వాణిజ్య శాఖ మంత్రి పీయూష్ గోయల్ అధ్యక్షత వహిస్తారు. 10 మందికి పైగా కేంద్ర మంత్రులు హాజరవుతున్నారు.

సదస్సు కోసం నగరాన్ని అలంకరించారు. ఆంధ్రా యూనివర్సిటీ మైదానంలో భారీ వేదికను నిర్మించారు. వచ్చే అతిథులకు ఉత్తరాంధ్ర జానపద కళలతో స్వాగతం పలుకుతారు. దీని ద్వారా సాంస్కృతిక మార్పిడితో పాటు పర్యాటకం కూడా ప్రోత్సాహం పొందుతుందని ప్రభుత్వం భావిస్తోంది. ముగింపు సమావేశంలో ఉపరాష్ట్రపతి సీ.పీ. రాధాకృష్ణన్, గవర్నర్ అబ్దుల్ నజీర్, ముఖ్యమంత్రి చంద్రబాబు నాయుడు పాల్గొంటారు.