విశాఖ మహిళా ప్రాంగణం: 30 ఏళ్లుగా మహిళలకు ఉచిత శిక్షణ, ఉపాధి అవకాశాలు

విశాఖపట్నం నగరంలోని పైనాపిల్ కాలనీలో ఉన్న మహిళా ప్రాంగణం 1992లో ప్రారంభమైంది. దివంగత ముఖ్యమంత్రి ఎన్.టి. రామారావు ఈ కేంద్రాన్ని ప్రారంభించారు. మూడు దశాబ్దాలుగా ఈ సంస్థ పేద మహిళలకు ఉచిత వృత్తి శిక్షణ అందిస్తూ ఆర్థిక స్వయం సమృద్ధికి సహాయపడుతోంది.

18 నుంచి 40 ఏళ్ల వయస్సు ఉన్న, 10వ తరగతి పాసైన మహిళలు ఇక్కడ శిక్షణ పొందవచ్చు. నర్సింగ్, బ్యూటీషియన్, టైలరింగ్, మగ్గం వర్క్, మార్కెటింగ్, డేటా ఎంట్రీ ఆపరేటర్ వంటి కోర్సుల్లో ఒకటి నుంచి మూడు నెలల శిక్షణ ఇస్తారు. శిక్షణతో పాటు ఉచిత వసతి, భోజనం కూడా కల్పిస్తున్నారు. ప్రస్తుతం నర్సింగ్, బ్యూటీషియన్ కోర్సులకు దరఖాస్తులు తీసుకుంటున్నారు.

ఇక్కడ శిక్షణ పొందుతున్న మహిళలు ఈ కోర్సులు తమ కుటుంబాన్ని ఆర్థికంగా ఆదుకోవడానికి ఎంతో ఉపయోగపడుతున్నాయని చెబుతున్నారు. ఒడిశా, చిన్నమషవాడ వంటి ప్రాంతాల నుండి కూడా మహిళలు ఇక్కడికి వస్తున్నారు. పెళ్లయిన మహిళలు, ఒంటరి తల్లులు కూడా ఈ శిక్షణ ద్వారా జీవితంలో నిలదొక్కుకునే అవకాశంగా భావిస్తున్నారు.

మహిళా ప్రాంగణం సీనియర్ అసిస్టెంట్ లక్ష్మి మాట్లాడుతూ, శిక్షణ పూర్తి చేసిన వారికి ప్లేస్మెంట్ సహాయం, సర్టిఫికెట్లు ఇస్తున్నామని, రుణ సౌకర్యం కూడా ఉందని తెలిపారు. ఈ సర్టిఫికెట్లతో మహిళలు తమ సొంతంగా దుకాణాలు పెట్టుకోవచ్చని చెప్పారు.