విశాఖ: వివాహం అయిన 40 రోజులకే వివాహిత అనుమానాస్పద మృతి

విశాఖపట్నం: నగరంలోని పీఎం పాలెం ఆర్హెచ్పి కాలనీలో వివాహం అయిన 40 రోజులకే ఓ వివాహిత అనుమానాస్పద స్థితిలో మృతి చెందింది.

మృతురాలు విజయనగరం జిల్లా మెంటాడ గ్రామానికి చెందిన ఎడ్రాపు కృష్ణవేణి (25). ఆమెకు ఇదే ఏడాది మే 13న దూరపు బంధువు ఎడ్రాపు మురళితో వివాహం జరిగింది. భర్త మురళి ఓ ప్రైవేటు కంపెనీలో, కృష్ణవేణి గోపాలపట్నంలోని ఓ షోరూమ్లో ఉద్యోగాలు చేస్తున్నారు.

బుధవారం ఉదయం భర్త డ్యూటీకి వెళ్లి తిరిగి వచ్చేసరికి కృష్ణవేణి ఇంట్లో ఫ్యాన్కు వేలాడుతూ కనిపించింది. మురళి పోలీసులకు ఫిర్యాదు చేశారు. పీఎం పాలెం పోలీసులు కేసు నమోదు చేసుకుని దర్యాప్తు ప్రారంభించారు.

కృష్ణవేణి తల్లిదండ్రులు మాత్రం ఆమె ఆత్మహత్య చేసుకునే వ్యక్తి కాదని, ఎవరో మూడో వ్యక్తి ప్రమేయం ఉండొచ్చని అనుమానం వ్యక్తం చేశారు. ఆఫీస్ లేదా హాస్టల్లో ఏదైనా ఒత్తిడి ఉందేమోనని పోలీసులకు తెలిపారు. పూర్తిస్థాయిలో దర్యాప్తు చేయాలని కోరారు.

మృతదేహాన్ని విశాఖ కేజీహెచ్ ఆసుపత్రికి తరలించగా, పోస్టుమార్టం నివేదిక కోసం ఎదురుచూస్తున్నారు. కేసు దర్యాప్తు చేస్తున్నామని, మృతికి గల కారణాలు ఇంకా తెలియలేదని పీఎం పాలెం సీఐ బాలకృష్ణ తెలిపారు.