విశాఖలో వేసవి క్రీడా శిబిరం ముగింపు; మంత్రి రామప్రసాద్ రెడ్డి హాజరు

విశాఖపట్నం: గోపాలపట్నంలో స్పోర్ట్స్ అథారిటీ ఆఫ్ ఆంధ్రప్రదేశ్ (SAAP) నిర్వహించిన వేసవి క్రీడా శిక్షణ శిబిరం ముగింపు కార్యక్రమం జరిగింది. ఈ కార్యక్రమంలో రాష్ట్ర యువజన, క్రీడా శాఖ మంత్రి రామప్రసాద్ రెడ్డి, స్థానిక ఎమ్మెల్యే గణబాబు పాల్గొన్నారు.

మంత్రి మాట్లాడుతూ, రాష్ట్ర ప్రభుత్వం క్రీడల అభివృద్ధికి కట్టుబడి ఉందని, ప్రతి క్రీడాకారుడిని ప్రోత్సహించడంతో పాటు రాష్ట్రాన్ని రోల్ మోడల్‌గా నిలబెట్టేందుకు కృషి చేస్తున్నామని తెలిపారు. సమ్మర్ క్యాంపుల్లో ప్రతిభ గుర్తింపు కీలకమని, ఇక్కడ గుర్తించిన పిల్లలను కోచ్‌ల ద్వారా శిక్షణ ఇచ్చి జాతీయ, అంతర్జాతీయ స్థాయికి తీసుకెళ్తామని చెప్పారు.

గత ఐదేళ్లలో ఇలాంటి సమ్మర్ క్యాంపులను SAAP నిర్వహించలేదని, ఈ సంవత్సరం 45 రోజుల పాటు శిక్షణ ఇచ్చామని మంత్రి వివరించారు. రాష్ట్రంలో క్రీడా మౌలిక సదుపాయాల కల్పనపై ముఖ్యమంత్రి చంద్రబాబు నాయుడు ప్రత్యేక దృష్టి పెట్టారని, ఉమ్మడి రాష్ట్రంలోనే హైదరాబాద్, విశాఖల్లో జాతీయ, అంతర్జాతీయ ఈవెంట్లకు వేదికలు ఏర్పాటు చేశారని పేర్కొన్నారు.

ఇటీవల ప్రభుత్వం గత ఐదు సంవత్సరాల్లో పెండింగ్‌లో ఉన్న క్రీడా ప్రోత్సాహకాలను చెల్లిస్తోందని, దాదాపు 800 మంది క్రీడాకారులకు 50 కోట్ల రూపాయల ప్రోత్సాహకాలు మంజూరు చేసినట్లు మంత్రి తెలిపారు.