మాలలకు రిజర్వేషన్లలో అన్యాయం: మంత్రి వివేక్; కేబినెట్ సబ్ కమిటీ ఏర్పాటు

మాల కమ్యూనిటీకి రాష్ట్ర ప్రభుత్వ ఉద్యోగాల రిజర్వేషన్లలో రోస్టర్ విధానం వల్ల అన్యాయం జరిగిందని తెలంగాణ మంత్రి వివేక్ వెంకటస్వామి అన్నారు. భద్రాద్రి కొత్తగూడెం జిల్లా భద్రాచలంలో జరిగిన మాల ఐక్యత సదస్సులో ఆయన మాట్లాడారు.

గ్రూప్-3 పోస్టుల్లో మాలలకు 5% రిజర్వేషన్ ఉండాల్సి ఉండగా, రోస్టర్ లెక్కల ప్రకారం 2.8 శాతం మాత్రమే లభించిందని వివరించారు. దీని వల్ల సుమారు 100 పోస్టులు కోల్పోయినట్లు తెలిపారు. ఈ అంశాన్ని మూడు సార్లు ముఖ్యమంత్రి దృష్టికి తీసుకెళ్లినట్లు చెప్పారు.

ముఖ్యమంత్రి ఆదేశాలతో మంత్రి ఉత్తం కుమార్ రెడ్డి నేతృత్వంలో కేబినెట్ సబ్ కమిటీని ఏర్పాటు చేశారు. ఈ కమిటీ రేపు ఉదయం 11 గంటలకు సమావేశం కానుంది. మాలలకు జరిగిన అన్యాయాన్ని సరిదిద్దే అంశంపై చర్చించనున్నారు.

ఈ అన్యాయాన్ని తప్పకుండా సరిచేస్తామని, కమిటీ సానుకూల నిర్ణయం తీసుకుంటుందని తనకు నమ్మకం ఉందని మంత్రి వివేక్ అన్నారు.