యువత నైపుణ్యాభివృద్ధికి 119 అడ్వాన్స్డ్ టెక్నాలజీ సెంటర్లు: మంత్రి వివేక్ వెంకటస్వామి

హైదరాబాద్‌లోని రాయదుర్గంలోని టీ-వర్క్స్‌లో జరిగిన ఫ్యూచర్ స్కిల్స్ సమ్మిట్‌లో రాష్ట్ర కార్మిక శాఖ మంత్రి వివేక్ వెంకటస్వామి పాల్గొన్నారు. క్వాలిటీ ఫ్యూచర్ స్కిల్స్ ఫౌండేషన్ వెబ్‌సైట్‌ను ఆయన ప్రారంభించారు.

యువతకు నైపుణ్యాలు అందించేందుకు రాష్ట్రంలో 119 అడ్వాన్స్డ్ టెక్నాలజీ సెంటర్లను ఏర్పాటు చేస్తున్నట్లు మంత్రి తెలిపారు. విద్యార్థులకు స్టైపెండ్ అందజేస్తున్నామని, నైపుణ్యం ఉన్న యువతకు జర్మనీ, జపాన్‌లలో ఉద్యోగ అవకాశాలు లభిస్తున్నాయని వివరించారు.

జర్మనీలో ఫిజియోథెరపిస్ట్‌గా ఎంపికైన తెలంగాణ విద్యార్థినికి నెలకు ₹3 లక్షల వేతనం వస్తోందని మంత్రి ఉదాహరణగా పేర్కొన్నారు. ఏఐ వల్ల ఉద్యోగాలకు ముప్పు లేదని, కానీ ప్రతి ఒక్కరూ తమ నైపుణ్యాలను నిరంతరం నవీకరించుకోవాలని సూచించారు.

హైదరాబాద్ సిటీ పోలీస్ కమిషనర్ సజ్జనార్ మాట్లాడుతూ, ఏఐ అవగాహన ఉన్నవారికి పోలీస్ డిపార్ట్మెంట్‌లోని సైబర్ సెక్యూరిటీ విభాగంలో ఉద్యోగ అవకాశాలు కల్పిస్తున్నామని తెలిపారు. నైపుణ్యాలు నేర్పిస్తున్న సంస్థల నిర్వాహకులను మంత్రి అభినందించి మెమెంటోలు అందజేశారు.