వివస్వత్ సప్తమి: సూర్య మంత్రాన్ని 12 సార్లు జపించడం వల్ల కలిగే ప్రయోజనాలు

ఆషాడ శుక్ల సప్తమిని వివస్వత్ సప్తమి లేదా ద్వాదశి ఆదిత్య సప్తమి అని పిలుస్తారు. ధర్మసింధు, నిర్ణయ సింధు, చతుర్వర్గ చింతామణి వంటి ప్రామాణిక గ్రంథాల ప్రకారం ఈ రోజు సూర్యారాధన చేయడం, సూర్య మంత్రం జపించడం విశేష ఫలితాలను ఇస్తుంది.

సూర్యుడు ఈ జగత్తుకు కన్ను వంటివాడు. సంవత్సరంలోని 12 నెలల్లో ఆయన 12 పేర్లతో భక్తులను అనుగ్రహిస్తాడు. ఆషాడ శుక్ల సప్తమి రోజున సూర్యుడిని వివస్వంతుడు అనే పేరుతో అర్చించాలి. వివస్వంతుడు అంటే తేజోవంతుడు అని అర్థం. ఈ రోజు చేసే ప్రత్యేక పూజలతో ఆయన భక్తులకు విశేష కృప చూపిస్తాడు.

ఈ సందర్భంగా ప్రతి ఒక్కరూ తమ ఇంట్లో దీపారాధన చేసిన తర్వాత 'ఓం వివస్వతే నమః' అనే మంత్రాన్ని 12 సార్లు జపించాలి. ఇది శక్తివంతమైన, సులభమైన మంత్రం. ఈ మంత్రం జపించడం వల్ల శరీరంలో చైతన్య శక్తి పెరిగి, శారీరక, మానసిక అనారోగ్యాల నుంచి ఉపశమనం లభిస్తుంది.

అదనంగా సూర్యునికి ఇష్టమైన ప్రదక్షిణలు దగ్గర్లోని సూర్యాలయంలో చేస్తే అనుగ్రహం తొందరగా లభిస్తుందని తెలిపారు. ఆలయానికి వెళ్లలేని వారు భవిష్య పురాణంలో చెప్పిన విధంగా అర్ఘ్యం సమర్పించవచ్చు. ఎర్ర చందనం, కుంకుమ కలిపిన అక్షింతలు రాగి పాత్రలోని జలంలో కలిపి, తూర్పు ముఖంగా నిలబడి ఆ నీటిని సూర్యునికి అర్పిస్తూ చివరగా ఒక మొక్కలో పోయాలి.

ఈ విధంగా చేయడం ద్వారా సూర్య భగవానుడి అనుగ్రహం సులభంగా లభ్యమవుతుంది. సూర్యారాధనతో శారీరక, మానసిక ఆరోగ్య సమస్యలు అధిగమించడానికి, జీవితంలో చైతన్యం పెంచుకోవడానికి ఈ మంత్ర జపం, అర్ఘ్యం ఉపయోగపడతాయి.