విశాఖలో రెండు నెలల తర్వాత వేటకు సిద్ధమవుతున్న మత్స్యకారులు

విశాఖపట్నంలో మత్స్యకారులు రెండు నెలల సుదీర్ఘ విరామం తర్వాత మళ్లీ సముద్రంలో వేటకు సిద్ధమవుతున్నారు. ఈ రెండు నెలల్లో బోట్లు, వలలు మరమ్మత్తులు చేసుకున్నారు. అర్ధరాత్రి నుంచి చాలా బోట్లు వేటకు బయలుదేరనున్నాయి.

ఇంధన ధరలు పెరగడంతో ఈసారి వేట ఖర్చు భారీగా పెరిగింది. క్రూడ్ ఆయిల్ ధరల ప్రభావంతో బోటు ఇంధనం, ఐస్ ధరలు గణనీయంగా పెరిగాయి. ఒక్కో బోటుకు రూ.లక్షల్లో అదనపు పెట్టుబడి పడుతోందని మత్స్యకారులు చెబుతున్నారు. ఆయిల్ లీటరు రూ.110 వరకు చేరింది. మొత్తంగా 30 శాతం మేర పెట్టుబడి పెరిగినట్లు వారు వెల్లడించారు.

మత్స్యకార భరోసా చెల్లింపుల్లో సాంకేతిక సమస్యల కారణంగా కొంత మందికి నిధులు అందలేదు. 314 బోట్లకు సంబంధించిన చెల్లింపులు ఆగిపోయాయి. అయితే, ఈనెల 8న రాష్ట్ర ప్రభుత్వం 5,190 మందికి భరోసా జీవో విడుదల చేసింది. ఆ మొత్తం ఎప్పుడు పడుతుందని మత్స్యకారులు ఎదురుచూస్తున్నారు.

ఈనెల 9న గంగమ్మ తల్లికి పసుపు కుంకుమలు ఇచ్చి పూజలు చేశారు. వేట ఎలా ఉంటుందో ఇప్పుడే చెప్పలేమని, 15 రోజుల తర్వాతే చేపల లభ్యతపై స్పష్టత వస్తుందని మత్స్యకారులు చెప్పారు. ఇంధన ధరల విషయంలో ప్రభుత్వం సహాయం చేయాలని వారు కోరుతున్నారు.