విజయనగరం కొప్పర గ్రామంలో వరద ముంపు.. ఇళ్లలోకి నీరు, వస్తువులు కొట్టుకుపోయాయి

విజయనగరం జిల్లా వంగర మండలంలోని కొప్పర గ్రామంలో తుఫాను ప్రభావంతో కురిసిన భారీ వర్షాలకు వరద నీరు ఇళ్లలోకి చేరింది. సువర్ణముఖి నది వరద ప్రవాహం గ్రామాన్ని ముంచెత్తడంతో రెల్లి వీధిలోని ఇళ్లు నీట మునిగాయి.

ఈ గ్రామం మధువలస రిజర్వాయర్ ఎగువ ప్రాంతంలో ఉంది. ఇళ్లలోకి నీరు చేరడంతో దుస్తులు, వంట సామాగ్రి సహా ఇంటి వస్తువులన్నీ కొట్టుకుపోయాయని బాధితులు తెలిపారు. వరద భయంతో రాత్రంతా రామ మందిరం వద్ద తలదాచుకున్నామని, ఉదయం ఇళ్లకు వచ్చి చూస్తే ఏమీ మిగలలేదని వారు చెప్పారు.

ఇప్పటివరకు ప్రభుత్వ అధికారులు ఎవరూ తమను పరామర్శించలేదని గ్రామస్తులు ఆరోపిస్తున్నారు. గతంలోనూ తుఫాను రాగా ఇదే పరిస్థితి ఏర్పడిందని, అప్పుడు కూడా ఎవరూ సహాయానికి రాలేదని వారు ఆవేదన వ్యక్తం చేశారు. మూడు రోజుల నుంచి వర్షాలు, వరద ఇబ్బందులు కొనసాగుతున్నాయని బాధితులు తెలిపారు.

సువర్ణముఖి నదికి కరకట్ట నిర్మించాలని, పక్కా గృహాలను కట్టించి తమను ఆదుకోవాలని గ్రామస్తులు ప్రభుత్వాన్ని కోరుతున్నారు.

ఈ ఘటనపై అధికారుల స్పందన తెలియాల్సి ఉంది.