విజయనగరం సిరిమానోత్సవం మంగళవారం మధ్యాహ్నం 3 గంటలకు ప్రారంభం

విజయనగరం పైడితల్లి అమ్మవారి తొలేళ్ళ ఉత్సవాలు కొనసాగుతున్నాయి. ప్రధాన ఘట్టమైన సిరిమానోత్సవం మంగళవారం మధ్యాహ్నం 3 గంటలకు ప్రారంభం కానుంది.

భక్తులు పెద్ద సంఖ్యలో అమ్మవారిని దర్శించుకుని ప్రత్యేక పూజలు నిర్వహించారు. ఘటాలు సమర్పించి మొక్కులు చెల్లించుకుంటున్నారు. వివిధ ప్రాంతాల నుంచి భక్తులు తరలి వస్తున్నారు. ఆలయాన్ని పుష్పాలంకరణతో అలంకరించారు.

ఎమ్మెల్యే పూసపాటి అతిథి గజపతిరాజు కుటుంబ సభ్యులతో కలిసి అమ్మవారికి పసుపు, కుంకుమ, చీర సమర్పించారు. ఉత్తరాంధ్ర ఇలవేల్పుగా పేరుగాంచిన ఈ ఆలయానికి ఉత్సవాల సందర్భంగా భక్తులు హాజరవుతున్నారు.

విజయదశమి తర్వాత వచ్చే మంగళవారం సిరిమానోత్సవం నిర్వహించడం ఆనవాయితీ. ఈసారి పతివాడ అప్పలస్వామి నాయుడు ఆరో తరం వారసుడు వెంకట్రావు నాయుడు సిరిమాను ఎక్కి భక్తులకు ఆశీర్వచనాలు అందించనున్నారు.

ఉత్సవ ఏర్పాట్లను కలెక్టర్ రామసుందర్ రెడ్డి పర్యవేక్షిస్తున్నారు. ఎస్పీ ఏఆర్ దామోదర్ ఆధ్వర్యంలో పోలీసు శాఖ భద్రతా చర్యలు చేపట్టింది.