వరంగల్ చేనేత కార్మికుల నిరాహార దీక్ష: కొత్త టెండర్ విధానం రద్దు చేయాలని డిమాండ్

వరంగల్ లో చేనేత కార్మికులు కొత్త టెండర్ విధానం రద్దు చేయాలని నిరాహార దీక్ష చేపట్టారు. ఇప్పటివరకు ప్రభుత్వ హాస్టళ్లు, సంక్షేమ శాఖలకు అవసరమైన బెడ్ షీట్లు, కార్పెట్లను టెస్కో ద్వారా నేరుగా కొనుగోలు చేసేవారు. కానీ ఇటీవల ప్రభుత్వం ఏకీకృత టెండర్ విధానం తీసుకురావడంతో ఉత్పత్తులు నిలిచిపోయాయి.

వరంగల్ లోని చేనేత కార్మికులు జియోగ్రాఫికల్ ఇండికేషన్ (GI) గుర్తింపు పొందిన ‘దరీ’లు (తివాచీలు) తయారు చేస్తారు. ఇక్కడ సుమారు 3,500 మంది నేరుగా ఈ పనిపై ఆధారపడ్డారు. మరో 10 వేల మంది పరోక్షంగా జీవనం సాగిస్తున్నారు. కార్మికులు తయారు చేసిన బెడ్ షీట్లు, కార్పెట్ల స్టాక్ పేరుకుపోయింది. టెండర్ ప్రక్రియలో పోటీ పడే స్తోమత తమకు లేదని, కార్పొరేట్ కంపెనీలు ఆర్డర్ తీసుకుంటే తాము రోడ్డున పడతామని వారు వాదిస్తున్నారు.

చేనేత కార్మికుల సంఘం నాయకుడు చిప్ప వెంకటేశ్వరులు మాట్లాడుతూ, టెండర్ వెంటనే రద్దు చేసి యధావిధిగా టెస్కోకు ఆర్డర్ ఇవ్వాలని డిమాండ్ చేశారు. డిమాండ్ నెరవేరకపోతే సిరిసిల్లలో జరిగినట్లు ఆత్మహత్యలు జరగవచ్చని హెచ్చరించారు. ఈ విషయంపై ప్రభుత్వం స్పందన తెలియాల్సి ఉంది.